Co tydziyń po naszymu: Dzisio wszedcy sfajnieli i aji psa trzeja czymsi szpecyjalnym futrować

”...łóna kieruje nas na Osiedli Podgórze”.

”...widać prziszrubowane chwolidło do dwóch zieleźnych rułek...”

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

UCZYŁ JEJICH DZIECKA

Nic sie nie zmiyniło łod łostatnigo czasu i dalij s kopieczka dzisio tóm ulicóm Hallera bydymy pokraczować.Zaroz kónsek dalij za skryntym w ulicem Jasnóm ciepnie sie nóm na łoczy przidrótowane do płota chwolidło łod kszeftu s pizzóm.Coby se jenakowóż do tej pizzy wbić swoji zymbiska trzeja bydzie przeszpacyrować sie aże na ulicem Katowickóm.Kómu prziszeł do czepani taki napad to móg eszcze tam dopisać nomero taxi i jakosi wszecko pasowało by do kupy.Po lewo nie idzie przynś wedla tej zarzowiałej tabuli,coby na ni łoka nie zeprzić, skyrs tego,że łóna kieruje nas na Osiedli Podgórze.Wedla ni,też na leko łod wyrchu przirdzewiałej rułce idzie uwidzieć mjynszóm tabulke s mianym ulica Morcinka.Kiery nie wiy gdo to był G.Morcinek to sie może przyńś na komunalny kierchów kaj łón w grobie spoczywo.Skoczowiocy byli szykowniejsi i postawili mu pomnik,coby młodziocy wiedzieli,że kiejsi jejich dziecka uczył we szkole powszechnej.Ło tej szurej wypłowiałej cestowej tabulce,kiero kazuje szoferom jechać sztyrycatkóm to nima ani co pisać,bo jak sie łóna sama łod starości nie obali to jóm rychlij i tak żodyn nie zrychtuje.Na prociw po drugi stronie cesty widać prziszrubowane chwolidło do dwóch zieleźnych rułek, kiere patrzi sie mulorzóm łod stawianio chałupi i aji łod tych co nieskorzij poradzóm łopucować jóm jakimsi agregatym.Do tej wielki tabuli,kierysi prziszfajsowoł mjynszóm tabulke,na kierej sie chwoli,że mo do przedanio jedzyni dlo waszego psa,abo kocura.Przepómnioł jednakowóż napisać kaj dzierży to rajski jedzyni i coby go nónś bydymy mieć s tym łostude.Możne, że to tak wyszpekulyrowoł, coby pies powónioł ty rułki,a potym sóm trefił ku tymu jedzyniu.

Mini słownik:

s kopieczka - z górki,

ciepnie - rzuci,

chwolidło - reklama,

czepań - głowa,

napad - pomysł,

zeprzić - oprzeć,

wedla - obok,

skyrs - z powodu,

miano - nazwa,

kiery - kto,

kierchów - cmentarz,

szury - pochyły,

łopucować - otynkować,

nieskorzij - później,

zrychtuje - naprawi,

cesta - droga,

prziszfajsować - przyspawać,

kaj - gdzie,

łostuda - kłopot,

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Uczył jeijch dziecka".