CO TYDZIYŃ PO NASZYMU: To nima leko mieć we starości wszecki cesty w Cieszynie

"...stoji też jakisi wielki celt...". fot. FJD

"...mały szpitolek...". fot. FJD

Dzisio Wóm zaś poczytóm po naszymu opowiadanie "Kiery je bogatszy" Zbigniewa Niemca, z książki "Kaj idziesz człowiecze". fot. FJD

cd. słownika:

blyszczeć sie - lśnić
Blyszczy sie cosi w trowie.

błana - wysuszony pęcherz zwierzęcia
Kiejsi takóm błanóm obcióngali łokna.

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Mieć dziurawom cestem

Myślym,że eszcze roz oglóndnymy dzisio tyn wafelkofy werk łod stróny cesty i zozdrzymy na jejich plac. Majóm tam pieknie wszecko pośmistane, bo je tam przeca robota s jedzynim. Wedla nich je tak cicho, bo isto ty zachdni kapitalisty tela dobrze zrobili, że kupili maszyny, kiere nie robióm krawalu. Dobrze by możne było dzisio tyn zrychtowny werk łod nich kupić i sprugować posyłać to nasze Prince Polo arabom tak jak to kiejsi za socjalizmu bywało. Na prociw tej “Olzy” usadził sie w poru chałupach MZD, kiery mo we starości wszecki cesty i mostki w całym Cieszynie. Dobrze by jednakowóż było coby tóm staroś ło nasze tretuary i cesty zaczli łod siebie i zrychtowali ty dziury na cescie przy jejich bramce. Isto łoni nie chcóm być gorsi łod tego szefca co w dziurawych bótach chodzi ani łod krawca co w potarganych galatach sie przesmrodzo i dali se za honór mieć dziurawóm cestem na pozoryndziu. Na jejich placu stoji też jakisi wielki celt w kierym isto cosi majóm schowane na lepsze czasy a możne w postrzodku je kupa soli kieróm w zimie bydom suć na cesty. Na drugi strónie ciepnie sie nóm na łoczy przerobióno staro sauna na mały szpitolek w kierym za nasze pinióndze zrychtujóm nóm zymby a przi płacyniu może aji nóm stanóć serce jak nóm wyłoślóm wiela płacymy. Możne tymu zaroz we drugich dwiyrzach je kardiologija, bo dobrze je zawsze mieć jakómsi asekuracyje. Zicher je zawsze zicher i lepszyj je cucić kogosi zaroz za dwiyrzami a nie smykać sie ś nim po szpitolach, bo nikiedy może aji chybić czasu na łodewrzyni łoczy. Jak sie nóm podarzi we zdrowiu łod nich wylyś na swoich klepetach, to do miejsca kaj mogymy se porzykać w każdej intecyji momy uż yno pore kroków.

A teraz zaś fajny wic:

Dwóch ożalców zamias po chodniku idzie po sztrece. Tyn jedyn cosi sie zmiarkowoł i prawi:
- Jónek podziwej sie ty schódki sóm jakisi dłógi.
- Ty schódki jak ty schódki, ale podziwej sie jaki ty gelyndry sóm ganc przi ziymi.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Kiery je bogatszy" Zbigniewa Niemca, z książki "Kaj idziesz człowiecze".