CO TYDZIYŃ PO NASZYMU: Roz za kiedy dobre je dóma aji zwekslować haziel

”...insze przidajne wieca ku wodzie...". fot. FJD

”...wiszóm przerozmajte płachty...”. fot. FJD

cd. słownika:

bindel - węzeł na krawacie
Mosz krziwy tyn bindel.

bindla - krawat
Jak żech wysztajgowoł to muszym chodzić w bindli.

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Auto s cesty skludzóm

Tak jak zustało obiecane zeszły tygodziyń bydymy dzisio dalij pokraczować tóm Biylskóm ku dołu. Zarozinko za tymi pieknymi chałupkami kierysi odewrził se kszeft s kuminkami i chwoli sie na szyldzie, że wóm to wszecko porobi jako chcecie a na kóniec jak sie patrzi poczosze was s piniyndzy. Kónsek dalij je kszeft s wiecami i inszym rupiecim do kómpielek i haźli, kiere wóm sie przidajóm jak se uznocie, że trzeja po nowymu dziynnie sie ożbluchać we wodzie abo zeprzić rzić na nowej pasownej do waszego zadku muszli. Mnożóm sie nóm w Cieszynie taki kszewty co rosmajte rułki i insze przidajne wieca ku wodzie i cyntralnym przedujóm, że aż strach rozmyślać co to bedzie jak uż cieszyniocy i pepiki wszecki kómpielki zrychtujóm. Możne, że kiejsi ty wielgucne hale, kiere wyglóndajóm jak stodoły od siedloków przerobióm na porzóndne kina i cieszyniocy nie bydóm musieli jeździć do Biylska, coby cosi fajnego w kinie obezdrzić. Kapke niżyj je kszeft co sie podpiyro na piynciu nogach i wyrozumieć sie nie do co tak naprowde tam robióm. Moja starka downo tymu kiejsi prawila, że to nima dobre jak je gdosi wszeckigo majster to od niczego nima rzymieśnik, bo podziwejcie sie na jejich płot na kierym wiszóm przerozmajte płachty z kierych nie bardzo idzie sie wyznać. Je tam taki misz masz coby nie dónś do tego co idzie im nejlepszyj - czy pojczowani autów, czy pojczowani prziczepek, czy kupowani i przedowani waszych autów czy możne aji na kóniec popuczyni uż popuczónych czy eszcze dobrych przirzóndów do jeżdżynio po cestach. Na kóniec co nima do uwierzynio poradzóm was tam aji ostrzigać a ku tymu jak bydziecie chcieli to eszcze sztucznym słóńcym przibrunatnić i wymasować a na kóniec wyparzić co sie jyno do. Możne, że to wszecko robióm zakiel wasze popsute auto s cesty skludzóm do warsztatu, bo to też majóm jak sie to dzisio prawi we ofercie. To je isto rekord w Cieszynie coby wciś pijyńć kszeftów do jednego i eszcze to zachwolać.

A teraz zaś fajny wic:

- Milaczku pośpiychej sie, bo uż je na nas czas - woło chłop do swoji baby, kiero sie oblyko
- Nie poganiej mie bo przeca uż trzisztwierci godziny ci prawiym, że bydym fertig za piyńć minut.

Mjyjcie sie wszedcy dobrze i wiesiolego popióntku.

Dzisio Wóm zaś poczytóm po naszymu opowiadanie "Dziwny mecz" Henryka Jasiczka, z książki "Humoreski Beskidzkie".