CO TYDZIYŃ PO NASZYMU : Drepszyni po schódkach to ni ma dobre dlo starek i starzików

...mianuje sie “Club Retro”...

...kszeft s pierściónkami...

...egzystuje księgarnia Matras...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jejich nacyja

Uż my sóm dzisio przi taki wielki chałupie z czyrwiónej cegły, kiero zustała postawióno w 1898 roku. Była to nejwiynkszo trzipiyntrowo chałupa w Cieszynie, kierom postawił Alois Jedek nejlepszy w tamtych rokach architekt i murorz w Cieszynie. Udzirżeć kiejsi takóm wielkóm chałupe i do ni nie dokłodać było tak drogi jak dzisio, tóż też najył jóm Niymcóm, kierzi naskludzali tu książek, coby jejich nacyja w naszym mieście miała co czytać. Pod spodkym była gospoda , kiero dzisio mianuje sie “Club Retro”. Wtynczas nie prziszeł im taki napad do czepani, coby to kómusi przedać, bo przeca zawsze jak je dwóch do jednej wiecy to to nima dobre. Po “Zampolu”, kiery tyn klub mioł we swoji starości uż tam je czworty właściciel i wyglóndo na to, że to nima kóniec. Zaś na wyrchu tej chałupy jak wylezymy po schódkach je Biblioteka Miejska, kiero też mo pod sobóm w powiecie inksze miynsze biblioteki na dziedzinach. Jako to kiejsi tyn pón A.Jedek wyszpekulyrowoł, coby dzisio szło tam wedla schodów wciś winde tego nie wiym, ale widać, że sie to podarziło i tusteloki nie muszóm uż drepsić po schódkach na wyrch do biblioteki. Zaś na dole przi Głymboki uż dłógi roki egzystuje ksiyngarnia Matras, kiero sie łóńskigo roku obstoła przed zawrzicim. Kapke dalij idzie zaś trefić na taki miynsze lauby, kierych chybio przi bibliotece, bo jak jóm stawiali to miastowi rajcy zakozali to postawić, skyrs tego coby Głymbokóm niechać szyrszóm. Zaroz pod nimi je kszeft s pierścionkami, orynglami i inkszymi świycóncymi wiecami dlo paniczek, kiere chcóm se poprawić urodem.

Mini słownik:
postawióno-zbudowana,
udzierżeć-utrzymać,
naskludzali-nasprowadzali,
czepań -głowa,
wiec-rzecz,
w starości-w opiece,
dziedzina- wieś,
wedla-obok,
podarziło- udało,
lauby-podcienie,
skyrs-z powodu,
oryngle-kolczyki,

Tóż miyjcie sie wszedcy dobrze i wiesiolego popióntku