CO TYDZIYŃ PO NASZYMU: Noworoczny winszbyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Tak w łostatnim tydniu każdego roku, a jak przepómnieli to aji w piyrszym tydniu po nowym roku tustelocy i nasi gorole tak se winszowali na NOWY ROK Na szczynści na zdrowi na tyn Nowy Rok, żeby wóm sie darziło, mnożiło kapusta i groch, żeby wóm sie darziło mnożiło we dworze i w kumorze, na kołeczku i we woreczku, w każdym kóntku po dziesióntku. Dej Boże co byście mieli tela wołków, co w płocie kołków, tela cieliczek co w lesie jedliczek, tela byczków co w lesie buczków, tela owiec co w lesie mrowiec, a w polu coby stoł snop przi snopie, a gazda miyndzy kopami jako miesiónc miyndzy gwiozdami i żeby jechoł wóz za wozym do gumna jak pszczły do ula i żebyście byli tacy weseli jako w niebie anieli. Żeby sie wóm wszecki dziywki powyzdowały, a pachołcy pożynili, a mie połaźniczka na wiesieli zaprosili. Prziszeł wóm tu połaźniczek, prziszełech tu po trójniczek, trójniczek mi dejcie zy mnie sie nie śmiyjcie, bo tu s wozym nie pojadym, suchej rzepy nie powiezym, a co mi docie to weznym- grosz abo dwa to je moja kolynda. Winszujym wóm szczynścio zdrowio na tyn Nowy Rok, ale ni yno na tyn Nowy Rok, ale na delsze czasy, abyście byli weseli jako w niebie anieli, aby sie wóm mnożiło darziło, abyście mieli zimioki jak chodoki, kapustem jak pnioki, bób jak żłób, żytko wszecko i proso i cobyście nie chodzili boso. A jo winszujym wszeckim tustelokóm, żber zdrowio i miech szczynścio, kiery mo być taki wielki jak każdy smrek s Wisełki. I coby sie wóm wszecko cały prziszły rok podarziło, a w kapsach piniyndzy sie wóm namnożiło. Mini słownik: winsz- życzenie, jedliczka- jodła, buczek-mały buk, mrowiec-mrówka, gumno-klepisko w stodole, połaźnik-składajacy życzenia, trójniczek-trzy grsze, smrek-świerk, żber-duże drewniane naczynie. Tóż miyjcie sie wszedcy dobrze i wiesiołego 2019 Nowego Roku
|
reklama
|
Dodaj komentarz