CO TYDZIYŃ PO NASZYMU: Moczyć zadek w zimnej wodzie to je fakt breweryja

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Szpitolowe gesztele
Chocioż tego dłógo eszcze ni ma, to uż tej zimy mómy pełny zadek. Dłógo uż tak nie było w naszym mieście, coby czegosi było za moc i naroz tego biołego piyrzo co leci s nieba je tela, że nikierzi ani s autami nie wyjechali s chałupy. Jako to bydzie dalij tego nie wiym, ale ostudy ś nim je tela, że trzeja go było zacznóć wywożać. Kaj to pieróm tego nie wiym, bo takigo zesolónego śniyga nie śmiy sie ciepać do Olzy, a na pole jak przidzie cosi zasioć, abo posadzić zimioki też ni. Chocioż możne by to był dobry napad, bo nieskorzij uwarzóne zimioki uż by my mieli posolóne. Zaszporowane by było na soli i kapke groszy w kapsach tustelokóm by zustało, bo ło to przeca dycki sie rozchodzi. Ale i tak mieli my szczynści, że w niedzielem jak prziszło do zbiyranio piniyndzy na szpitolowe gesztele dlo małych dziecek, to sie odciepliło i wszecko sie dobrze podarziło. Tak samo jak łóńskigo roku zaś rozmajci ludzie, kierym je za ciepło, moczyli swoji zadki w zimnej wodzie, kiero była naloto do szmacianych żberów. Czy to je eszcze taki zaimawe tego nie wiym, ale byłby uż czas, coby cosi inkszego wyszpekulurować. Bo dzisio do tych szmacianych żberów wlazuje “mech trowa”, a przi tym eszcze udowo morsów. Tymu też bardziyj do śmiychu było to, że ci kierzi tam wlazowali do tych żberów, nejprzód przed zdrzadłym sie nie połogłóndali i pokazowali to, co raczyj pasowałoby przikryć. Każdego roku fórt też je kapke takich co sie przewlykajóm za staroświeckich wojoków i udowajóm bóg wiy yno kogo. Gwery majóm plastikowe, a mantle i bóty isto s muzeum, bo dzisio takich w żodnym kszefcie nie idzie dostać.

Mini słownik: naroz- nagle, nikierzi-niektórzy, ostuda-kłopot, kaj- gdzie, ciepać-rzucać, kapsa-kieszeń, dycki-ciągle, gesztel-urządzenie, podarziło-udało się, żber-zbiornik, wyszpekulyrować-wymyślić, wlazuje-wchodzi, zdrzadło- lustro, fórt-ciągle, gwery-karabiny, mantel-płaszcz, kszeft-sklep

Tóż miyjcie sie wszedcy dobrze i wiesiołego popióntku