Podarziło sie jakosi rotuzowym przegnać wszeckich tych, co swoji chwolidła wieszali na płotach i uż dzisio aji widać rozmajte chrosty za tymi płotami. fot: FJD
CO TYDZIYŃ PO NASZYMU: Chwolidło idzie przirazić byle kaj
“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Mioł myntelka
Podarziło sie jakosi rotuzowym przegnać wszeckich tych, co swoji chwolidła wieszali na płotach i uż dzisio aji widać rozmajte chrosty za tymi płotami. Znaszli sie jednakowóż tacy szprytni, kierzi wieszajóm teraz ty swoji chwolidła na miastowych żółtych autobusach. Na jednym ś nich idzie aji uwidzić to, że gdosi dziynnie bydzie sie dziwoł wszeckim do łoczy, kierzi przidóm do niego, a łón nieskorzij im rzeknie, jaki łokulory mo se naździoć na łoczy. Problym bydzie mioł yno s tym, bo przepómniół, że w każdóm niedzielem majóm zawrzite, a na tym chwolidle wyraźnie stoji, że “codziennie” idzie tam do nich prziś. Tak to uż dzisio s każdóm reklamóm je, to łóna wszecko uniesie i każdy kiery mo kapkem grosza zachwolo na ni aji to, czego nie poradzi zrobić. Tyn tydziyń też kierysi uż zacznył “reklamować” Wielkanoc, bo jako to inakszyj ty trzi zajónce zmianować, kiere czympiały w kolorowych auteczkach na trowniku wedla pómnika Chrystusa Króla, na Górnym Rynku. Fest zaimawych wiecy miały na sobie ty zajóce, kiere kapke jakby udowały rotuzowych oficyjeli. Jedyn ś nich mioł myntelka pod karkym i siedzioł w żółtym autku zaś drugi mioł cosi rudego na czepóni, a trzeci porem rzodkich szkutów pomjyndzy uszami. Kapkem dalij do trowy wrażóne były plastikowe grziby, kiere udowały prowdziwne, chocioż grzibiorze dobrze wiedzóm, że we trowie taki grziby nie rosnóm. Dłógo tam ta wiekanocno reklama nie wydzierżała, bo za dwa dni, kierysi ty zajónce tam s tela pozbiyroł i mo ich isto we swoji zogródce przi chałupie. Coby jenakowóż tym grzibóm nie było luto, to kierysi pochynył wedla nich prowdziwne dynie, kiere też możne kómósi bydóm za jakisi czas przidajne.
Mini słownik gwary cieszyńskiej:
podarziło sie - udało się, chwolidło - reklama, chrosty - krzaki, idzie aji uwidzieć - można nawet zobaczyć, nieskorzij - później, rzeknie - powie, naździoć - nawlec, zawrzite - zamknięte, kapkem - trochę, poradzi - potrafi, zmianować - nazwać, czympiały - kucały, wedla - obok, zaimawe - interesujące, myntelek - muszka, czepóń - głowa, szkuty - włosy, nie wydzierżała - nie wytrzymała, zogródka - ogródek, nie było luto - nie było przykro, pochynył - porzucił, przidajne - potrzebne.
Tóż miyjcie sie wszedcy dobrze i wiesiołego popióntku!
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz