CO TYDZIYŃ PO NASZYMU : Fórt przibywo kszeftów s szyldami, s kierych nie idzie sie wyrozumieć

...przijnóm na stanowisko sprzedawca

...miano CENEA je jakosi dziwoki

...idzie s kopca...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Skyrs oblyczki

Jakosi tej zimy sóm my przeganiani skyrs oblyczki, bo nie wiadomo jakóm tym padym oblyc se jakle. Roz suje śniyg, coby za porem godzin stajeć, abo zaś na niego wartko napadze deszcza i som my spadki w tym samym miejscu. Całe szczynści, że ta Głymboko po kierej dzisio szpacyrujymy idzie s kopca i jak padze to zole i aji krónfleki w naszych bótkach nie nacióngnóm wody. Stanyli my przed takim kszeftym, kiery jak inksze nic nimo za auzlagom napisane jynzykym Kochanowskiego, yno sie im podarziło na taki mjynszej tabulce napisać ło kierej majóm odewrzite. Mianuje sie łón “ESOTIQ”, ale skónd łóni sóm nie idzie prziś na to, ani przi pumocy Googla. Przez auzlagem yno widać, że lajbików ani inkszych wiecy dlo paniczech tam u nich nie chybio. Rómki auslagi sóm s jakigosi czyrwiónego drzewa, abo możne je to posztrajchowane takóm szpecyjalnóm barwóm. Na dwiyrzach przirażóno je kartka s inforacyjóm ło wolnym “stanowisku” sprzedawcy. Jo se zawsze myśloł, że stanowisko to sie patrzi jakimusi dyrektorowi, a w takim sklepie mo sie etat. Na tej kartce je napisane, że przyjnóm na stanowisko sprzedawca, coby możne pasowało aji dlo chłopów, kierzy by sie musieli wyrozumieć na przedowaniu lajbików i inkszych babskich wiecy. Kapke dalij zaś kierysi isto nie chodził do polskich szkół, bo chocioż interes mo w Dębowcu uż łod 1996 roku to miano “CENEA” je jakisi dziwoki. Lepszyj by możne by było mianować sie dejmy na to “DĘMBINA”, to aji Czesi i Słowocy kaj łóni majóm też swoji kszefty wiedzili by zaroz, że tyn towor/zbożi/ je s Polska.

Mini słownik:
skyrs-z powodu,
oblyczka-ubranie,
jakla-kurtka,
spadki-z powrotem,
padze-pada,
zole-podeszwy,
krónfleki-obcasy,
kszeft-sklep,
auzlaga- wystawa,
podarziło- udało się,
lajbik-biustonosz,
chybio-brakuje,
odewrzite-otwarte,
wiec-rzecz,
posztrajchowane-pomalowane,
sie patrzi- należy się,
kapkę- trochę,

Tóż miyjcie sie wszedcy dobrze i wiesiołego popióntku.