CO TYDZIYŃ PO NASZYMU: Zdrowszyj je szpacyrować po lesie, a ceste niechać w spokoju

Jakosi to szpacyrowani po Cieszynie uż wlazło w krew tym piekniejszym tustelokóm, do kierych trzeja zarachować nasze paniczki. Dziw yno biere, że sóm to prawie dycki ty nejmłodsze, kiere takigo szpacyru dlo zdrowio na zicher nie potrzebujóm. Bo przeca, jak sie mo dwacet roków, to eszcze żodne kości nie sóm zastote i ruszani sie dlo młodzioków je lepszy przeca jakisi hałdamasz na rynku zrobić. Dziw też biere to, że szpacyrujóm prawie yno młode dziywczynta, a ty posunióne w rokach siedzóm na rziciach dóma. Eszcze nie tak downo było widać aji rozmajte paniczki, kiere uż sóm na pyndzyji, jak miały we starości wyrzazowani tych stromów wedla sztreki, kiere rosły kolem cieszyńskigo banhofu. Pełno też ich było, jak ci macherzi łod telefónów stawiali takóm zieleźnóm wieże na Małej Łónce, ale jak widać psińco to pumógło. Strómy zustały wyr-znióne aże do korzyni i wytargane ze ziymi. Zieleźno wieża też sie mo dobrze i cały krawał ło to, coby ji nie stawiać zduchnych wiater. Tak rozmyślóm, coby pumuglo w takich manifestacyjach, bo jak widać do dzisia taki szpacyrowani to je na psinco. Nie pumugło ani szpacyrowani wedla granicy, bo Czesi, a niskorzij aji nasi odewrzili jóm w ty dnie w kiere łóni chcieli i żodyn ni mioł nic do godanio. Pumógło by isto yno, prziwiónzywani sie do strómów, abo siedzyni noc i dziyń w tych miejscach, kiere chcymy ochrónić łod czegosi złego. Ni ma to tak leko, bo dzisio ludzie sóm nałuczóni wygdy i żodyn na taki szpacyr nie prziniesie ze sebóm deki, coby nieskorzij se na ni sie legnóć. Chocioż jak wdać w telwwizorni i na to policmajstry znaszły se uż rade, bo we sztyróch poradzóm aji starszóm paniczke łapnóć za rynce i nogi i skludzić jóm s cesty.

Mini słownik gwary cieszyńskiej:

wlazło - weszło, paniczki - kobiety, dycki - ciągle, na zicher - na pewno, hałdamasz - zabawa, rzić - tyłek, pyndzyj - emerytura, we starości - w zainteresowaniu, wyżazowani - wycinanie, sztreka - torowisko, banhof -dworzec, zieleźnóm - żelazną, psinco - gówno, nieskorzij - później, zduchnył - zdmuchnął, wedla -obok, stróm - drzewo, deka - koc, skludzić - sprzątnąć.

Tóż miyjcie sie wszedcy dobrze i wiesiołego popióntku.