CO TYDZIYŃ PO NASZYMU: Zarobiać idzie aji na tym jak sie kómusi powiy, że nimo na zdrowiu chyby

"...som dwa kszefty w kierych idzie kupić oblyczke...". fot. FJD

"...pożynili butikowóm oblyczke ze szmateksym". fot. FJD

"...szyjóm kożuchy s wszelijakigo zwiyrza...". fot. FJD

Dzisio Wóm zaś poczytóm po naszymu opowiadanie "U Planeciorki" Henryka Jasiczka, z książki "Humoreski Beskidzkie". fot. FJD

cd. słownika:

bez uroku - zachwyt
Bez uroku aleś pieknóm chałupe se wystawił.

bezmala - prawdopodobnie
Bezmała wczora ujec doł facke ciotce.

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Mieć dóma flinte

Na Biylski, kieróm dzisio zaś pujdymy rozczapiły sie prawie wszecki kszefty i dochtorzi, kierzi chcóm poprawiać nóm zdrowi, a przi tym możne kapke nas polutować abo opatrować. Naprociw tego kszeftu, kiery przeduje ryntgynowane żymły je aptyka w kierej mogymy se kupić przepisane przez dochtora lyki, a zaroz niżyj jak wóm zbydzie piniyndzy sóm dwa kszefty w kierych idzie kupić oblyczke dlo całej familiji. Jak pokroczymy kapke ku dołu to trefiymy na kszeft w kierym pożynili butikowóm oblyczke ze szmateksym. Co tego uż ludzie dzisio nie wymyślóm coby jyny zakszefcić i utarżyć pore groszy. Kónsek niżyj sóm dochtorzi, kierzi nas przebadajóm jak sie nóm podarzi w Cieszynie nonś jakómsi robote, abo jak chcymy dóma mieć flinte i ś ni postraszyć sómsiada abo iś s kamratami na gón. Mogóm sie też tam u nich lyczyć szportowcy, ale łóni to ni majóm fest na rynke bo yno tam do nich idzie prziś dwa razy do tydnia i to wczas dopołednia. Przegnani też tam stela nie zustanóm ci, kierzi chcóm zarobiać joko szoferzi i potrzebujóm mieć kwit na swoji zdrowi coby mógli jeździć po cestach wszelijakimi auciskami, autobusami a na budowach bagrami i możne aji walcami. Dwiyrze dalij szyjóm kożuchy s wszelijakigo zwiyrza, kiery mo na siebie moc rozmajtych włosisków, takich coby poradziły nas w zimie zagrzoć. Taki warsztat to mo kapke dosmolóne bo na wiosne i w lecie roboty isto ni majóm wiela i w zimie muszom to nadegnać. Latoś ta zima nas doś dłógo dopalowała i wszymóm se, że im sie podarziło wynś na swoji, a szycio isto mieli tak moc, bo teraz warsztat zawrzili coby możne se kapke łoddychnyć. Jak uż to wszecko obyndziecie a eszcze kapke grosza zustanie wóm w kapsie to możecie wlyś do magla i dać se wyprościć rozmajte prodło. Nie wiym jyno jako tyn magiel prziszeł na to coby po tym proszczyniu waszego prodła namowiać was na łorlab nad morze, do Moraw i aji w Gory Świętokrzyski, bo taki atrakcyje uwidzicie za jejich auslagóm.

A teraz zaś fajny wic:

Prziszeł roz cygón do gazdy po pytce. A że było to na jesiyń i kopali zimioki gazda prawi aż pumoże przi wykopowaniu to cosi dostanie. A cygón prawi gazdowi: - Czy wyście sóm gupcy? Niech ty zimioki wykopie tyn co ich tam zakopoł.

Mjyjcie sie wszedcy dobrze i wiesiolego popióntku.

Dzisio Wóm zaś poczytóm po naszymu opowiadanie "U Planeciorki" Henryka Jasiczka, z książki "Humoreski Beskidzkie".