CO TYDZIYŃ PO NASZYMU: Wiela razy zawrzóm eszcze te granice, tego isto żodyn nie wiy
być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Fórt sie mi zdo, że nie bydzie uż ło czym pisać, a tu mosz chłopie zaś sie cosi podarziło, bo Czesi zawrzili granice. Kiery to wyszpekulyrowoł, coby zawrzić granice bez zawiyranio to na zicher dołbych mu “Nobla”. Bo podziwejcie sie jaki to je szprytne ! Nie trzeja żodnych wojoków, ani żodnej budy s haźlym na granicy stawiać, a wszedcy naroz dostali pietra, czy idzie przez te granice przelyź czy ni ? Mało tego, napisali jak uż kierymu udo sie przelyź na drugóm strónem, to nie śmiy tam być delij jak dwanos godzin. Jako to bydzie gdo kóntrolowoł tego też isto żodyn nie wiy, bo przeca sie ło to rochodzi, coby fórt wszedcy mieli kapke stracha s tego befelu. Sóm tacy co prawióm, że jak sie przez most przelezie to Czesi strzelóm mu fotke i jak pudzie spadki, a przewali tych dwanos godzin to zapłaci “pokute”. Nie bydzie to jednakowóż taki ganc ańfachowe, bo wszedcy na gymbach dzisio noszóm maski/roużki i dycki bydzie biyda chycić tego prowdziwego barabe. Na wszecko przeca idzie nónś jakómsi rade, bo w kapsie każdy mo na zicher rezerwnóm maske s inszóm farbóm. Mało tego, ludzie uż tak wymyślaóm, że na tych maskach idzie uwidzić co yno chcecie i jakóm farbe chcecie. Sóm czorne, czyrwióne, biołe modre, kwiaciate i bóg wiy eszcze jaki. Nadrukowane rozmajte stwory, gymby i aji litery coby też wiedzieć s jaki partyje gdo je. Tak czy inakszyj Czesi zaś nas szlagli, bo nie dali ani grosza na zawrzici granicy, a podarziło sie im kolem tego zrobić takóm propagandem, coby tak do kóńca żodyn nie wiedzioł czy może ich nawszczywić czy mo dóma siedzieć na rzici. Mini słownik gwary cieszyńskiej: fórt - ciągle, sie podarziło - udało się, skyrs - z powodu, wyszpekulyrowoł - wykombinował, zawrzić - zamknąć, na zicher - na pewno, podziwejcie sie - popatrzcie się, haziel - toalata, czy idzie - czy można, nie śmiy - nie może, delij - dłużej, kapke - trochę, befel - rozkaz, prawióm - mówią, spadki - z powrotem, pokuta - kara, dycki - zawsze, ganc ańfachowe - całkiem proste, dycki- z awsze, kapsa - kieszeń, na zicher - na pewno, nas szagli - nas wyprzedzili, żodyn - nikt, nawszczywić - odwiedzić, na rzici - na tyłku. Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz