CO TYDZIYŃ PO NASZYMU: Taki prziszeł czas, że jyny trzeja kszefcić

Starziku Mieciu,
je żech rod, żeście sie ku nóm przidoł. Jo już też móm roki na starzika, myślym, że my tego widzieli łobo dość. Jyny możne każdy spoza inszego winkla. Jo se na mój gupi rozum myślym, że jak by gdosi chioł ty nasze szyfy a glajzy kupować, tak by my ich sprzedowali. Problym je isto w tym, że wszyscy już tych szyfów a glajzów majóm dość. Kiedysi ich brali Rusi, czy im ich było trzeba, czy ni, a my zaś brali łod nich pszynice, czy nóm jóm było trzeba, czy ni. Tak sie to jakosi lepiło a wszyscy mieli robote. Ale jako prawiym, możne tymu nie rozumiym dobrze, bo żodyn ni mo patynt na rozum. Wiym jyny jedno, że aji moji trzi dziecka sóm kansik w rzici we świecie, bo jyny tam naszli robote, a że moje wnuki, kaj sie już narodzóm, nie bedóm mówić po naszymu. I nie bedym sie pytać, gdo za to może, bo bych musioł prać po pyskach, a jo je przeca katolik, tóż sie nie patrzi.
.
Co mnie jednak cieszy, Starziku Mieciu, je to, żeście sie łodezwoł po naszymu, boch se myśloł, że my tu sóm z Dziołchóm na bezludnej wyspie. Tak by my se wszyscy społym mógli nikiedy skoczyć na piwko. To cieszyński Bracki za wiela nie stoji, tak by my mógli zónść do Piasta na czeski stronie na Radegast, ale panowi Dralowi to nie powiymy, bo by sie nagniywoł, że nie wspiyrómy rodzimych kapitalistów, jyny tych czeskich .
.
Dziołcho stela, ło czarownicach tego wiela nie wiym, ale se pamiyntóm, że jak żech prziniós ze szkoły w dziynniczku uwage, tak sie żodyn na nic nie pytoł, jyny żech łod taty hned dostoł banie. A co do moresów - niedowno żech czytoł ło szesnostrocznej dziełusze, kiero dała mame ku sóndu za to, że je zmuszano do ukludzanio w kwartyrze, uczynio sie a że nie śmiy kurzić trowe. Tóż tam kansi pogrowo jeszcze tyn Złoty Róg. A nóm, Starziku Mieciu, "ostał się jeno sznur" .

No muszym s dobrym łobyczajym sie opisać. Jeżech starzikiym dlo tych moich małych i wielkich chwantów. Móm ich moc a że móm ich łokropnie rod to im dowóm fest zwóle.No i jeżech stela! Łod kieregosik downego czasu ,czytujym te wasze roztomajte łopisy. Ło guzikarni, łobyczajach i też tak w tej mojij czepani grzebiym i dzinki wóm z tych chłapcowych roków wylazujóm wspómniynia jak szydło z miyszka.O Brómbowerii,Rorim ,Szramku ,Bubeli. Móg bych ło tym kupe nabazgrać.To były fabryki przed wojynne, eszcze w sześćdziesióntych rokach moc ludzi zatrudniały.Ale niech to łopisze kiery lepij po naszymu,bo do mie to je raczyj tymat zastympczy,podobny do tych tymatów sejmowych co zamiast ło rzóndzyniu to fórt ło buzerantach bałuszóm. W tych waszych łopisach sóm i dobre rady jak pinióndze zbiyrać kierych ni ma,jak se roboty narobić a przi tym eszcze zarobić.Przi bezrobociu dobre i to. W tej mojij czepani zaś zawrzało wspómniyniami ło downym Cieszynie.Wszyscy musieli robić,yny było pore wónglorzy na banchofie ,harowali przi wagónach.Dziołcha stela pisze ło tym złotym rogu-na przeca ón był! Miała go solidarność-zasrali go.Po tym myślym,że tym rogiym były stocznie, przemysł,huty-nasz roztomajty majóntek narodowy,ziymie teraz przez zagranicznych wykupowane.Moja WIELKO OJCZYZNA sie kurczy i biydnieje znieważano przez lemingi-nawet ni ma sie czym brónić! Andrzej mo jednak recht ,że złotego rogu ni ma -uż ni ma -zóstoł yny cham("miałeś chamie złoty róg").Miyjcie sie fajnie esi poradzicie! Łopisołech to co mie ogrómnie mierzi,żeby to zrychtować to trzeba kupe roków, moc piyniydzy kierych ni ma, ponikierych też moresu nauczyć. Szkoda mi yny tych moich chwantów ,bo óni dycki bydóm ciyrpieć jak mie uż nie bydzie.Nie psioczcie na mie , boch ni ma żodnym móndrokiym od gwary ,yny łod mojigo mówiynio jak mie w chałpie nauczyli. Do dzisio móm ztym kłopot jak chcym rzóndzić po Polsku :)