CO TYDZIYŃ PO NASZYMU: Przekrymbiałe wieca godzóm sie jyno na wyciepani

”...Delikatesy Rybno-Spożywcze...”

”...po lewo na taki małej szkarpie...:

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

WYSIEDNÓĆ Z TASZKAMI

Ta samo notura ło kierej żech pisoł zeszły tydziyń rozcióngo sie też wedla tego przistanku na kierym stowo autobus nomero dwacetjedyn. Ze zadku widać jakisi posiónek kiery przidajny je isto tymu gazdowi, co mo kapke wyżyj swojóm chałupe. Dobre je też to dlo miastowych, bo jak przidzie im chwiliczkem poczkać na autobus to mogóm sie podziwać jak trowa rośnie, a możne, że aji usłyszóm ćwiyrkani ptoszków. Gorzij jednakowóż majóm jak przidzie jakosi szudera, abo w zimie śmniegym zafujo. Przidałoby sie też tam kónsek daszku nad tóm ławkóm na kierej je łopowoga siednóć, skyrs tych przekrymbiałych trzóch kanciatych kulików prziszrubowanych do betónowych nóg. Kómu w dzisiejszych czasach to rzeknóć nie wiadómo, bo bydzie ciynżko trefić na pana, kiery mo we starości tyn plac. Tak to je dzisio zwyr-zane, że trzeja sie dobrze nachodzić coby zachycić kiery je łod czego. Czy ci łod autobusów majóm pod sobóm przistanki, czy je na łopak i ci łod przistanków majóm pod sobóm autobusy. Nima to taki ańfachowe jak by se gdo myśloł i coby prziś s tym do porzóndku trzeja nejprzód zahoczyć ło ratusz i tam możne wóm powiedzóm kiery je łod czego. Jak uż tyn przistanek minymy to po lewo na taki małej szkarpie trefiymy na “Delikatesy rybno spożywcze” w kierych nie uwierzicie, ale idzie wszecko dostać. Je to kapke łod rynki, ale możne skyrs tych rybów tustelocy aji s miasta tam przijadóm. Majóm przeca zaroz wedla tyn przecudnej urody przistanek, na kierym mogóm wysiednóć s taszkami i w tych delikatesach nakupić tego co sie jyno żywnie do.

Mini słownik:

wedla - obok,

ze zadku - z tyłu,

posiónek - pastwisko,

podziwać - popatrzeć,

szudera - ulewa,

łopowoga - odwaga,

przekrymbiałe - przegnite,

prziszrubowane - przykręcone,

opatruje - opiekuje,

zwyr-zane - zagmatwane,

ańfachowe - proste,

trefiymy - spotkamy,

kapke - trochę,

taszka - torba.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Wysiednóć z taszkami".