Tela hałdamaszu

Podziwejcie sie ludziska jako tyn czas żynie. Eszcze rok tymu było tela hałdamaszu na rynku w Cieszynie skyrs tego granio s Orkiestrą Świątecznej Pomocy, a latoś jakosi żodyn grać nie chcioł. I nie wiym, czy ni mioł chynci czy raczyj powolynio. Szło jednakowóż na rozmajte diwolóngi trefić, kiere plyntły sie po mieście. Na rynku stoł autobus do pobiyranio krwie, kiery jakosi ni mioł wziyńcio, bo isto rychlij żodyn ło nim nie wiedzioł. Stoł też tam jedyn wojok, a tak naprowde jedyn taki synek fest przi sobie, kiery wojoka udowoł. Po co dzier-żoł taki wielki gwer w rynkach, tego nie wiym, ale możne tymu, coby tustelocy kierzi sie tam prziplyntali ciepli mu porę złotych do tej papyndeklowej kiśniczki. Coby ludzi nachósować do dowanio piniyndzy na tyn szczytny cel, to pore chłopów miało taki napad, coby na zómku dować piwo za tela, wiela gdo móg do tej kiśniczki wciepać piniyndzy. Insi zaś namowiali lufciorzi, kierzi tym padym znaszli sie na zómku, do szpacyrowanio po nim s takim jednym chłopym przewleczónym za jakigosi “cudoka”. To szpacyrowani jednakowóż sie przidało tym, kierzi s historyjóm Cieszyna sóm na bakier, bo tyn”cudok” jak szeł to fórt opowiadoł, co kiejsi i gdo robił na cieszyńskim zómku. Wszecko to nie było taki fest zaimawe jak kiejsi, ale wystarczyło, coby ludzie kierzi szmatłali sie po Cieszynie to uwidzieli i ciepali pinióndze o podstyrczónych papyndeklowych kiśniczek. S tego widać, że lustelokóm stykło se yno spómnieć, jako to kiejsi przi tym zbiyraniu piniyndzy wiesioło bywało i ze zawrzitymi łoczami poradzili trefić do papiórzanych kiśniczek.

Mini słownik gwary cieszyńskiej:

żynie - gna, hałdamasz - zabawa, skyrs - z powodu, latoś - w tym roku, żodyn - nikt, powolyni - zezwolenie, isto - pewnie, rychlij - szybciej, wojok - żołnierz, fest - mocno, dzierżoł - trzymał, gwer - karabin, ciepli - rzucili, papyndeklowo - tekturowa, kiśniczka - pudełko, nachóswać - namówić, napd - pomysł, lufciorz - turysta, tym padym - w tym momencie, fórt - ciągle, podstyrczóne - podstawione, kiejsi - kiedyś, zawrzite - zamknięte, poradzili - potrafili, papiórzany - papierowy.

Tóż miyjcie sie wszedcy dobrze i wiesiołego popióntku.