CO TYDZIYŃ PO NASZYMU: Niepodarzóne schódki

”...jakisi schódki...”. fot. FJD

”...gnajóm auta...”. fot. FJD

Dzisio Wóm zaś poczytóm po naszymu opowiadanie "Jedynoste przikozani", Zbigniewa Niemca z książki "Kaj idziesz człowiecze". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Mo jakisi feler

Dzisio zamias gzuć autym do wyrchu po tej ulicy Gwido Langera pujdymy tam szłapcugym. Zaroz za tym cestowym kolcym uwidzymy taki wielki chwolidło s kierego sie dowiymy, że nowościóm dzisio je kupiyni se dłóżnika. Kaj idzie go kupić to nie poradzymy sie zmiarkować, bo dzisio wszecko ludzie chcóm załatwiać przez telefón. Nejlepszyj tego cygóna nie widzieć na łoczy i rozmyślać se, że to je porzóndny człowiek i nas nie łocygani. Taki mómy dzisio świat, że idzie kupić wszecko i żodyn sie niczymu nie dziwuje. Gupota ludzko przeca nimo miary i nie wiym czyście czytali, że uż hańdownij do kupiynio była aji wieża Eiffla w Paryżu ale srandowniejsze było to, że snoci podarziło sie takigo guptoka nónś co jóm kupił. To jednakowóż nima łostatnio atrakcyja na tej nowej ceście, bo u nas to je normalne, że każdo nowo cesta mo jakisi feler. Gazety uż o tym felerze pisały ze dwa roki tymu, coby go poprawić, a rozchodzi sie ło to, że chodnik s prawej stróny tej cesty mo co chwile jakisi schódki po kierych paniczki s wózkami majóm ogrómnóm utrope przejechać. Trzeja by było na dole postawić takóm tabulke, coby ty mamy, kiere chcóm po tym chodniku sie przeszpacyrować wiedziały,że zawsze ze sobóm muszóm weznóć swojigo panoczka jako pumagiera do noszynio wózka s dzieckami. Jak uż wydropiymy sie na wyrch to stóńcie se na moście pod kierym, dniym i nocóm w łobie stróny gnajóm auta do i ze świata. Nie wszecki jednakowóż jadóm bo moc ich stoji tam na placu coby se kapke spocznóć. Sóm dnie co je ich tela, że ani przejechać nie lza i nima tam pana coby tym porzódnie poradził regirować. Za tydziyń przyglóndnymy sie tymu czym idzie tam zakszefcić i jaki cygóny nas tam obskoczóm.

Mini słownik:

gzuć - pędzić,

szłapcugym - piechotą,

cestowe kolco - rondo,

chwolidło - reklama,

nie poradzymy - nie potrafimy,

łocygani - okłamie,

srandowniejse - śmieszniejsze,

cesta - droga,

paniczka - kobieta,

dziecka - dzieci,

kapke - trochę,

regirować - kierować.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Jedynoste przikozani", Zbigniewa Niemca z książki "Kaj idziesz człowiecze".