CO TYDZIYŃ PO NASZYMU: Na półke do GS-u

"...nejłacniejsze lónty i roztomajte czytaczki...". fot. Ewelina Szuścik

"...kieróm se wzión pod piecze GS". fot. Ewelina Szuścik

"...je aji parkplac dlo tych co śmigajóm na kole". fot. Ewelina Szuścik

Dziś ostatnia sobota stycznia, zatem zgodnie z zapowiedzią, po Zebrzydowicach spacerujemy dziś z Eweliną Szuścik - poetką, miłośniczką gwary.

Przyndymy sie po dziedzinie

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Warzónki uż nie dostaniesz...!

Witejcie pieknie moi roztomili w tym Nowym Roku. Uzaś my sóm starsi ale nie bydymy sie rozckliwiać nad sobóm, bo by człowiek musioł dostać gupoty do czepani, tuż lepszy sie je przyńś na szpacyrek po takij dziedzinie jak Zybrzidowice. Ostatnio byli my przi kinie tuż skuli tego, że je zima nie pójdymy dzisio fest daleko, coby gdo rymy do nosa nie dostoł idoszolóntómy sie yny do postrzodka dziedziny kaj na prociw "Gminy" je kszeft z roztomajtymi przidajnymi wiecami. W tej leciwej uż chałupie hańdownij była gospoda kiero patrziła kiejsi do Rudolfa Kolaczka, a kieróm se wzión pod piecze GS. Szło tam dostać roztomajtóm gorzołke, piwo i cosi na szmak baji kiszónóm ogórke abo harynka, ale mocka jii chybiało ku tymu coby jóm mianować jak by sie patrziło "Restauracjóm". Kie postawili przi ceście "Hotelowóm" to staróm gospode u Kolaczka zawrzili i do dzisia je tam tyn kszeft s przidajnymi wiecami ale nie yny, boznóndziecie tam aji: świyczki na kierchów, sztrómowe wieca, kije dlo wyndkorzy, strzybne oryngle, pierściónki, roztomajtóm chemije, bawidełka dlo dziecek, rajferszlusy, zicherki, knefle, forhangi, bandle i mocka inkszych wiecy kiere nie sóm nóm zbyteczne w żywobyciu. W drugi talji tej chałpy sprzedujóm łokna i dwiyrze. Jak na Europe patrzi przed GS-ym je aji parkplac dlo tych co śmigajóm na kole. Kónsek dalij za winklym uwidzymy papydekiel z kszeftu w kierym idzie dostać nejlepsze ale też nejłacniejsze lónty i roztomajte czytaczki, a mianuje sie to "Butik u Janki". Kiesi w Zybrzidowicach było wiyncyj gospód jako kszeftów i handlyrzi, a dzisio je ganc na opak. Teraz w tej chałpie warzónki uż nie dostaniesz, ale ponikierzi pamiyntajóm eszcze czasy kie tam chłopi szli na półke po szychcie...

Mini słownik:

postrzodek - środek,

harynek - śledź,

cesta - droga,

sztrómowe wieca - rzeczy na prąd,

strzybne oryngle - srebrne kolczyki,

bawidełka - zabawki,

rajferszlusy - zamki - suwaki do ubrań,

zicherki - agrafka,

knefle - guziki,

forhangi - firany,

bandle - wstążki,

parkplac - parking,

śmigać na kole - jeździć na rowerze,

kónsek - kawałek,

lónty - ubrania,

czytaczki - prasa głównie dla kobiet,

półka - mały kieliszek,

warzónka - rodzaj wódki.

Miyjcie sie wszedcy dobrze i wiesiołego popióntku!

Dzisio Wóm zaś poczytóm cosi od siebie "Gorzołczano strziga"