CO TYDZIYŃ PO NASZYMU: Móndroki chyciły słóńce

"...akurantnie panoczki zaprawiały takóm tabulke...". fot. Ewelina Szuścik

"...a możne kierysi ś nich też musioł tam stować...". fot. Ewelina Szuścik

Dziś ostatnia sobota października, zatem zgodnie z zapowiedzią, po Zebrzydowicach spacerujemy dziś z Eweliną Szuścik - poetką, miłośniczką gwary.

cd. słownika:

blambory - zlewki z obiadu
Blambory sie dycki dowało babucióm.

blamborzić - mieszać różne płyny
To nima dobre blamborzić kwit s piwym.

Zybrzidowice to je tako dziedzina kiero je akurantnie postrzodku, miyndzy Jastrzymbiym a Cieszynym i skuli tego mómy jednak kónszczek cesty do jednego i drugigo miasta a bydzie tego isto kańsi szesnoście kilometrów w jednóm stróne. Ponikierzi co ni majóm auta jadóm na kole abo muszóm czakać na nieskorniczek i tu s tym czakanim nie było to wiesiołe, bo kie sie zrobiło uż ćma to nie jedyn woloł w chałupie siedzieć niż czakać po ćmoku na autobus. Tuż te nasze móndroki, kiere siedzóm w tej wielkij chałupie postrzodku dziedziny wszymły se że to je opowoga aji uż na śćmiywku stoć przi ceście, a możne aji kierysi ś nich też musioł tam stować i isto skuli tego wpod im rupieć do łepa, coby tam dać jaki światło. Yny teraz tak, kiery bydzie płacił za sztróm? Dyć to je jako by nie było doś drogo wiec kie by sie miało świycić całóm noc. Mógli by zrobić taki szaltry kiere sóm po chałpach ale kie by tak gdo zapómnioł wyłónczyć na takim cykoczu światło przed wleziyniym do autobusu, to też by musieli moc za sztróm płacić? Szło by eszcze pozaprawiać jaki petryolki pod budóm przistanka ,yny wiycie jaki to dycki je, że mógły by sie kumu do chałupy zaszolóntać - tak przez przipadek. Tóż tymóndroki majóm czepanie isto nie yny od parady, bo wysmyczyli skónsi pinióndze na taki tabulki co chytajóm słóńce a kiere mianujóm sie "solarami". Cosi uż ich pozaprawiali na dziedzinie i isto eszcze nie skóńczyli. Kie żech ostatnio szła na szpacyrek po tej naszej dziedzinie, akurantnie panoczki zaprawiały takóm tabulke na wyrchowinie przistanka i muszym powiedzieć, że przeokropnie wartko im do szło. S ciekawości musiałach wieczór sie podziwać jako to funguje i teraz je mi kapke luto, że uż nieskorniczkiym nie jeżdżym, bo na przistanku se aji idzie jakómsi ksiónżke poczytać a kie sie kieruje autym to nie idzie. Yny tak żech se wszymła, że tako nowo wiec na dziedzinie może sie kumu przeokropnie spodobać i bydzie se jóm chcioł spodoryndzić. Moc długo nie było trzeba czakać bo bezmała, kumusi sie uż spodobały ty słóneczne tabulki i próbowoł se jednóm pojczać a kie mu to nie wyszło tuż ze zgryzoty isto, narobił okropnego hałdamaszu na tym przistanku. Ptoszki ćwiyrkajom, że skuli tego bezmała majóm być na zastawce przikryncóne kamery, kiere majóm za zadani wylynkać tych co se sami pojczujóm roztomajte wieca. Kie uż ty wszecko widzónce patrzały zaprawióm to s dnia na dziyń taki obyczajny przistanek nie bydzie uż ganc obyczajny a człowiek chocioż na chwile może sie pochwolić, że był w telewizorze abo kómputrze. To tak kapke do srandy, ale pokiel eszcze ty tabulki zaprawiajóm a inkszych se uż żodyn nie pojczowo, to muszym powiedzieć, że u nas w Zybrzidowicach świyci słóńce aji w nocy. Kiesi, by to moja starka uwidziała to by isto dała na rzykani, bo by se myślała, że to isto jakisi czary...

A teraz zaś fajny wic:

- Eda, na powiydz mi co je bardzij ciynżki kilo piyrza czy kilo zielaza?
- Na pierónie , dyć to je jedno dycki kilo je kilo...
- Ja? Taki żeś je móndrok to se sciepej nejprzód na szłape kilo piyrza a potym kilo zielaza,to uwidzisz co je ciynżejsze...

Dzisio Wóm podrzisto moja cerka Amelka opowiadani "Jak my mieli kore" kiere żech ji napisała.

Miyjcie sie wszedcy dobrze i wiesiołego popióntku!