CO TYDZIYŃ PO NASZYMU: Kiery wiy, że blajsztyft poradzi rzeknóć każdej dzieusze, kiedy mo se obyc lajbik

...kszeft s telefónami...

...tela kszefciorzy telefónowych...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Łostuda s lajbikym
Nie uwierzicie, ale uż aji w naszym mieście każdo paniczka, kiero mo łostude s lajbikym może popytać "braffiterke", coby wziyła ś ni miare i doradziła kiery lajbik bydzie na nie dobry. Czymu tyn fach mo taki zagramaniczne miano tego nie wiym, ale przeca byłby uż pumału czas zacznóć ty miana przekłodać na naszóm rzecz. Jo by mioł taki napad, coby tyn fach zmianować lajbikarkóm i na zicher uż żodne paniczki tu stela nie łómały by se jynzyków przi kupowniu lajbików. Kierysi prziszeł na to, że to przeca nie sóm bóty kiere sie na nodze uruchtujóm i trzeja ku tymu fachmana co poradzi rzeknóć każdej paniczce, jaki se mo naprowde tyn lajbik kupić.Kónsek dalij na Głymboki je we dwiyrzach kszeft s telefónami, kierych dzisio wszyndzi je pełno. Skóńczył sie uż czas w kierym, coby se ze sobóm pomówić trzeja było nejprzód dróty po słupach porozcióngać i s tym było dycki moc łostudy. Dzisio wszecko leci w lufcie i uż jedyn drugimu nie przestrziguje drótów, coby jego kamrat nie poradził zwónić kaj chce. Kiejsi, coby dozwónić sie do Warszawy trzeja było aji porem godzin smitrynrzyć na poczcie, a potym jak sie uż to podarziło to eszcze s drugi stróny tego dróta zamias chłopa rzóndziła nóm do ucha jakosi baba. A dzisio mómy tela kszefciorzi telefónowych, że jak nóm kiery ś nich dejmy na to w pyndziałek smierznie to uż we wtorek mogymy u inkszego dostać nowy telefón.Też tóż isto skyrs tego, zaroz dwiyrze dalij je inkszy kszeft s telefónami w kierym bydymy mógli dstać aji zielóny telefón w czyrwióne kwiotki, a za rok isto aji waserlajtungym.

Mini słownik:
łostuda-kłopot,
lajbik-biustonosz,
miano-nazwa,
nasza rzecz-nasz język,
podarziło-udało się
napad-pomysł,
na zicher-na pewno,
dwiyrze-drzwi,
dycki-zawsze,
łostuda-kłopot,
luft-powietrze,
przestrziguje-przecina,
kaj-gdzie,
krzefciorz-biznesmen,
waserlajtung-rura z wodą,
rzondzić-mówić,
kamrat-kolega

Tóż miyjcie sie wszedcy dobrze i wiesiołego popióntku.