CO TYDZIYŃ PO NASZYMU: Kaj w Cieszynie idzie zarobić prowdziwe pinióndze?

”...za skryntym je autowy warsztat...”. fot. FJD

”...ku miastu Motelowóm...”. fot. FJD

Dzisio Wóm zaś poczytóm po naszymu opowiadanie "Do Europy", Zbigniewa Niemca z książki "Kaj idziesz człowiecze". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Udowo kładziwko

Obiecołech przed tytniym, że dzisio przizdrzymy sie tym kszeftóm kiere, znaszły se plac na tym wielkim moście, ale nima to taki ańfachowe, bo tam szłapcugym nie idzie sie dostać. Bydym musioł jakosi nieskorzij sie tam przejechać na kole, abo siednóć do auta i udować, że jadym do republiki. Skyrs tego dzisio pujdymy ku miastu Motelowóm i bydymy sie prziglóndać co tam nowego je wystawióne. Zaroz za skryntym je autowy warsztat w kierym jak pisze na szyldach poradzóm wóm dogodzić na dwcet przileżytości. Jo tam bardzo w taki cuda nie wierzym, bo to przeca nima możne coby w takim małym parterowym kszefcie telkowne wieca sie pomieściły. Jo uż wolym dać se sprawić swoji auto u takigo co zno sie yno na poru wiecach i poradzi chybe wartko w mojim aucie nónś i potym zaroz jóm sprawić aji ze zawrzitymi łoczami. Nejgorzij jak szraubcyjer udowo kładziwko a eszcze ku tymu mo w rónczce przirażóne klyszcze, kierymi nie poradzi sie nic łodkryncić. Jo mioł kiejsi taki kozik przi, kierym były aji nożyczki, ale jyno były na pokoz, bo ustrzigać nimi nie szlo ani papiórka. Dómy uż im pokuj, bo kónsek dalij idzie trefić na kszeft w kierym mogymy dobrze pojeś, zeprzić głowe na zogłowku, abo jak przidzie nóm chyńć, a w szrajtoflu eszcze cosi szczyrko, to aji obalić sztwiertke. A o tym SPA, kierym łóni sie też chwolóm ani nie piszym, bo nie wiym bardzo co to je i bydym tam musioł nejprzód posłać Mojóm, boch sie zwiedzioł, że ło tych dziwactwach rozmyślajóm jyny nasze baby.

Mini słownik

przizdrzić się - przyjrzeć się,

kszeft - biznes,

ańfachowe - zwyczajne,

szłapcugym - iść piechotą,

nieskorzij - później,

koło - rower,

skyrs - z powodu,

je wystawióne - jest wybudowane,

coby - żeby,

przileżytość - okazja,

wieca - rzeczy,

chyba - wada,

zawrzite - zamknięte,

szraubcyjer - śrubokręt,

kładziwko - młotek,

ustrzigać - uciąć,

szrajtofel - portfel,

sztwiertka - ćwiartka,

nejprzód - najpierw,

posłać Mojóm - wysłać żonę.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Do Europy", Zbigniewa Niemca z książki "Kaj idziesz człowiecze".