CO TYDZIYŃ PO NASZYMU: Dzisio kóni sie nie podkuwo,bo żodyn uż ich nie chowie.

”...jakisi Sumarum pumoże wszeckim doradzić...”

”...kolem kierej pies wahuje przi budzie...”

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

SAMO NOTURA

Dzisio eszcze muszymy cosi napisać ło tym cysorzu kiery przeszło sto roków tymu był na Mniszwie i dziwoł sie jak jego wojocy s gwerami gónióm po rajczulach. Problym je w tym,że dlo jednych ty gónitwy były na “Becyrku”, a dlo drugich na “Egzecyroku” i coby wszeckim dogodzić nejlepszyj niech to sie nazywo jak gdo chce. Bo przeca eszcze sie taki nie narodził co by wszeckim dogodził. Tak czy inakszyj pujdymy tóm Słowiczóm na dół i podziwómy sie na ty wszecki ornitologiczne krziżowatki, o kierych możne udo sie cosi napisać. Zaroz wedla tej zapuszczónej chałupy ”Macierzy Szkolnej” je ulica Kukułcza kiero krziżuje sie s Bocianióm na kierej egzystuje kowol. W dzisiejszych czasach kowole uż kóni nie podkuwajóm jyny ze zielaza robióm rozmajte wieca, kiere ludzióm przidajne sóm dóma. Zaś podkowe jak kiery nóndzie to nie bydzie chledoł kónia, kiery jóm stracił jyno powiesi takóm zar-zowiałóm nad dwiyrzami, bo snoci łóna przinoszo szczynści. Na prociw po drugi strónie cesty idzie uwidzieć powieszóne kapke szuro taki dziwoki chwolidło, na kierym pisze,że jakisi “Sumarum”pumoże wszeckim doradzić co mogóm zrobić ze zarobiónymi pinóndzami. Pisze aji tam, że jak byście ni mieli to po ceście ło niego zahoczyć, to łón poradzi do was przijechać i nie bydziecie sie musieli nadarymnie łostudzić. Przepómnioł jyno napisać kaj miyszko i jako sie naprowde nazywo, bo to “Sumarum” to je isto miano tego interesu. Kapke dalij wyglóndo na to, że czas sie zadzierżoł, bo jak sie podziwómy na te chałupe kolem kierej pies wahuje przi budzie, to na zicher znóndymy sie w pińdziesióntych rokach. Nie widać tam żodnej techniki jyno naobkoło je samo notura.

Mini słownik:

gwer - karabin,

podziwać sie - popatrzeć,

krziżowatka - skrzyżowanie,

wedla - obok,

wieca - rzeczy,

nóndzie - znajdzie,

przidajne - potrzebne,

chledać - szukać,

kaj - gdzie,

rajczula - pastwisko,

łostuda - kłopot

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Samo notura".