CO TYDZIYŃ PO NASZYMU: Czy przidzie kiejsi taki czas i tusteloki dajóm tej trowie pokuj?"Moja ty słodko cieszyńsko mowo być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Kapke sie zaś tego nazbiyrało i ciynżko bydzie wybrać, co tak naprowde fajnego napisać. Przimierzołech sie do tych tabulek cestoych, kierych gdosi tak moc nastawioł na Hajduka i na Zamkowej, że ciynżko je ich aji porachować. Je ich tam tela, że isto same ty zieleźne kuliki na kierych ty tabulki wiszóm, trzeja by było isto w Trzyńcu odlywać cały dziyń, a farbe miyszali w Polifarbie ze dwa dni. Skónd sie ich tela biere tego nie wiym, ale na iste kierysi mioł w magazynie za moc tych zieleźnych rułek i chcioł sie ich wartko pozbyć. Pore dni dni tymu zaś jacysi móndrocy siykli trowe przed tyjaterym, chocioż łona ledwo łod ziymi łodstowała. Kómu łona zawadzała, tego naprowde nie wiym, ale na iste, kierysi se szuko roboty i tym razym, na tyn trownik padło. Skyrs czymu ci ludzie sóm tak uwziyńci i nimogym tej trowie dać pokuj, tego też nie wiym, ale sie mi zdo, że możne uż rychtujóm tyn trownik dlo tej gospody co Tramawajym Cafe sie mianuje. Bydóm sie musieć s tym śpiychać, bo za chwiliczkem lato sie pominie, a przeca w zomiyntach żodyn siedzioł nie bydzie. Chocioż możne, że by to było aji dobre, bo je tam s kopca i szło by sie tam spuszczać na sónkach. Przi tyjaterze by sztartnył, a w gospodzie przi szynku by sie zastawił i obalił w szymkwasie sztamperle kwitu. Bydym im to musioł rzeknóć, bo bydzie to na zicher lepszo atrakcyja dlo miasta, niż ta studnia w kierej ni ma fórt wody. Dlo tych co majóm wiynkszego pietra iż insi, możne że bydzie lepszyj wloć im do karku tego kwitu tam na wyrchu, to sie im w łoczach podwoji i nieskorzij ze sónkami wewalóm naroz do dwóch gospód. Mini słownik: kapke - trochę, strong>cestowe - drogowe, zieleźne -żelazne, kulik - kołek, isto - naprawdę, na iste - naprawdę, kierysi - ktoś, wartko - szybko, tyjater - teatr, uwziynty - uparty, rychtować - przygotowywać, mianuje - nazywa, śpiychać - śpieszyć, spuszczać - zjeżdżać, zomiynt - zaspa, kwit - wódka, sztamperla - kieliszek, fórt - ciągle, zicher - na pewno. Tóż miyjce sie wszedcy dobrze i wiesiołego popióntku
|
reklama
|
Dodaj komentarz