CO TYDZIYŃ PO NASZYMU: Coby se rónk nie zmazać

"...w kierej je aż cima od urzyndników...". fot. FJD

"...trefiymy na ulice Krziwom...". fot. FJD

Dzisio Wóm zaś poczytóm po naszymu opowiadanie "Skoli w rzyce", Zbigniewa Niemca z książki "Kaj idziesz człowiecze". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Obsztelować sztróm

Dzisio na chwilem przidzierżymy sie przi chałupie w kierej mogymy se obsztelować sztróm. Kiejsi robowali my to tam kaj tyn sztróm sie wyrobiało a dzisio po ceście eszcze musi być pore pośredników i każdy potrzebuje cosi na nas utarżyć. Dzisio trzeja płacić aji za używani drótów przez kiere przecisko sie tyn sztróm i nie wiym czy aji nie kożóm nóm płacić za ty słupy na kierych wiszom ty dróty. Skyrs tego coby im lepszyj szło to obiyrani nas s piniyndzy, to dlo jejich urzyndników wystawili dwupiyntrowóm chałupe w kierej je aż cima od tych co chcóm nóm wyoślić wiela i za co bydymy płacić. I tak to dzisio mómy, ze mnożóm sie nóm na każdym kroku rozmajci pumagierzi, kierzi majóm jyno w głowie to, coby nas odrzić s piniyndzy. Dobre by było coby wróciły ty czasy w kierych wszedcy przedowali to co sami zrobili i nie potrzebowali żodnych akwizytorów ani handlyrzy, kierzi róbióm wszecko, coby se rónk nie zmazać. To samo mómy s zimiokami, zielininóm, wajcami, mlykym i bóg wiy esczcze s czym co je przidajne do ocyganiynio, abo utarżynio wiyncyj łod tego za wiela dejmy na to tyn zimiok u siedloka zustoł obsztelowany. Jak my uż tak ponarzykali to mogymy sie puścić dalij ku Karolince. Zaroz trefiymy na ulice Krzywóm chocioż lepszyj pasowalo by jóm zmianować Pokryncónóm, bo skryntów tam je tak moc, że jak pojadymy po ni s wielkim szfóngym to może nóm aji wolant s gorści wytargć. Przed tóm rajzom po tej Krzywej ulicy na samym kraju trefiymy na pieknie opucowany kszeft naszego cieszyńskigo Społem, w kierym idzie kupić wszecko to co nóm je przidajne do jedzynio i eszcze insze wieca.

Mini słownik:

obsztelowac - zamówić,

sztróm - prąd,

cesta - droga,

utarżyć - zarobić,

skyrs - z powodu,

wystawić - wybudować,

zmazać - ubrudzić,

zielinina - warzywa,

wajce - jajko,

ocyganić - okłamać,

zimiok - ziemniak,

siedlok - gospodarz na wsi,

sie puścić - popędzić,

trefić - spotkać,

szfóng - rozpęd,

wolant - kierownica,

rajza - podróż,

opucowany - otynkowany,

wieca - rzeczy.

Mjyjcie sie wszedcy dobrze i wiesiołego popióntku.

Dzisio Wóm zaś poczytóm po naszymu opowiadanie "Skoli w rzyce", Zbigniewa Niemca z książki "Kaj idziesz człowiecze".