CO TYDZIYŃ PO NASZYMU : Co było kiejsi uż nie przidzie

...rozmajte biura...

...wyżyj kwartyry dlo ludzi...

...w kierych idzie zwekslować pinióndze...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Dwacet piyńć

Coby sie zwiedzieć wszecko ło chałupach przi Głymboki trzeja piyrsze wedla nich przynś i sie im s bliska przizdrzić. Jedna s piekniejszych chałup mo nomer dwacet piyńć i postawióno zustała w downych rokach przez Franza Stillera eszcze za Austryji . Nejprzód była tam yno kawiarnia i gospoda, a po tym jak tyn Franz prziszeł ku pinióndzóm przebudowoł jóm na wielki dwupiyntrowy hotel “Austria”. Fórt jednokowóż było mu było tego stawianio mało i coby nawszczewnicy przed spanim mieli eszcze wiyncyj uciechy znaszeł plac na sale kóncertowóm w kierej duchali w trómpety wojocy s cieszyńskigo regimyntu. Poczytołech też ło tym, że w szternostym roku przed piyrszóm wojnóm zahoczył ło tyn hotel aji nasz Józef Piłsudski, kierymu podarziło sie jakosi zamiyszać Austryjokóm w czepaniach i wychcieć na nich zwól do zegnanio do kupy polskich wojoków s kierych zrobił legionowóm brygade. Za socjalizmu jak isto wszedcy tustelocy pamiyntajóm na parterze był dóm towarowy, a wyżyj kwartyry dlo ludzi. Dzisio sóm tam wszelijaki maści rozmajte biura w kierych aji znaszli se plac dwa wybrańcy narodu polskigo, kierych ciynżko je tam trefić. Je też tam biuro łod asekuracyji “Hestia”, a wedla ni egzystuje “Dziennik Zachodni”, nejstarszo powojynno gazeta na Śląsku. Zaroz wedla sóm dwiyrze w kierych idzie zwekslować nasze pinióndze na taki kierymi poradzymy płacić w całej Europie i aji w Ameryce. S tym wekslowanim trzeja dycki kapke poczkać i sie nie śpiychać , bo dziynnie ty kursy inakszyj stojóm i szkoda naszych złocioków wydować na darymo.

Mini słownik:
zwiedzieć-dowiedzieć,
wedla-obok,
przizdrzić-przyjrzeć,
postawióno-wybudowana,
nejprzód-najpierw,
fórt-ciągle,
nawszczewnik-gość,
duchali-dmuchali,
trómpeta-trąbka,
podarziło-udało,
czepań –głowa,
zwól-pozwolenie,
wszelijaki-różne,
asekuracyja-ubezpieczenie,
dwiyrze-drzwi,
wekslować-zamieniać,
dycki-zawsze,

Tóż miyjcie wszedcy dobrze i wiesiołego popióntku.