, piątek 29 marca 2024
Co tydziyń po naszymu: Kómu to zawadzało?
F.J. Dral, współpracownik portalu gazetacodzienna.pl, prowadzi kącik gwarowy "Co tydziyń po naszymu", fot. ARC 



Dodaj do Facebook

Co tydziyń po naszymu: Kómu to zawadzało?

F.J.Dral
\"Gdo sie za swój jynzyk wstydzi, takim niech sie każdy brzidzi\".
J.Kubisz kiedyś napisał:

"Stary Cieszyn z wieżą Piasta
siadł nad Olzą i snać śni
o minionych chwale dni".

A jak żech to poczytoł, co tyn J. Kubisz napisoł, toch se zaros wszymnył, że to nie było tak downo. Bo przeca jeszcze dwacetpiyńć roków tymu w Cieszynie było tela rozmajtych fabryk /werków/, że aż sie chce ich zmianować. Myślym, że jeszcze je moc ludzi w Cieszynie, kierzy w nich robowali i mogóm sie s nami tym podzielić. Co tam kiejsi wyrobiali /produkowali/ i jako im to szło. Bo jo dobrze pamjyntóm taki Werki, co robiły - motory - Celma, werzojg - Cefana, rajfeszlusy - Zampol, fajercojgi i kocherki - Termika, szwajsaparaty - Cespa, sztolwerki i wafle - Olza, otomany i amerykanki - Tapicerzy, szachy - Jedność, noże i łyżki -Polvid, metanomierze - Elekrometal, tryczka i sweterki - Juwenia, farby i laki - Polifarb i tuplowanie jeszcze jakisi insze, o kierych se róntym nimogym spómnieć.

Jesi Wy se spómnicie to napiszcie, a może też wjycie, kiery z tych panoczków na ratuszu w Cieszynie to wszecko posprzedowoł abo kozoł pozawjyrać. Fest bydym rod, jak mi o tym naszóm cieszyńskóm gwaróm napiszecie.

Pieknie też dziynkujym Panu Andrzejowi za życzynia Wielkanocne i do nich sie prziłónczóm i życzym wszeckim czytelnikóm "Kącika Gwarowego" wszeckigo co nejpiekniejsze, nejfajniejsze, aby prz stole świątecznym fajnie sie Wóm po naszymu w Cieszynie rzóndziło, a w Kóniakowie gwarziło.

Dziynkujym też pieknie Panu Tomaszowi Sochackiemu co wyoślił wszeckim definicję folkoru.

Tomasz Sochacki 2011-04-18 09:32:13
Móm ujca we Warszawie, a dycki jak do niego zajadym, to oba wyrzóndzómy po naszymu a Warszawioki yny uszy nacióngajóm, a czasym sie pytajóm, skónd my sóm - isto kansik s połednia Polski s Goralije. Ujec mie sóm pyto, coby kapke porzóndzić naszóm rzeczóm, bo rod se podrzisto po naszymu a żodyn sie nigdy s nas nie śmioł.

Co inszego jak sie idzie kansik do becyrku - jak widzym, że paniczka rzóndzi po naszymu to jo też, ale jak rzóndzi w jynzyku literackim, to nie bydym rzóndziuł po naszymu, bo to nie o to idzie. Idzie o to, coby rzóndzić po naszymu tam, kany sie do, bo slónsko rzecz to ni ma jynzyk urzyndowy, a becyrk je becyrk. Ze żodnym ni ma co na siłe drzistać po naszymu jak nie chce - trzeja dycki wyczuć sytuacyj.

Jak nadawca a odbiorca rzóndzóm tym samym jynzykiym, to dycki kómunikacyj je miyndzy nimi lepszo, bo sie lepszy zrozumiejóm. A je aji tak, że gdosi na siłe chce kómusikej wciść swojóm rzecz, a wtynczas to je tako demonstracyj, że jo je inkszy, że jo móm inkszóm rzecz - a to nie o to idzie.

Przipómniała mi sie definicyj folkloru, eszcze ze studiów - folklor to je przekaz treści, kiej nadawca a odbiorca sóm s tego samego środowiska, a rzóndzóm, śpiywajóm, abo grajóm swobodnie, a nie bojóm sie, że sie gdosi bydzie ś nich śmioł. Tóż ta naszo rzecz bydzie wtynczas takim czystym folklorym, kiej bydymy rzóndzić po cieszyńsku s tymi, kierzi tego chcóm, a naszym rzecz znajóm. Jak se chłopi s dziedziny siednóm w aryndzie, dajóm se po półce, a drziszczóm po naszymu, a pote jak uż majóm wiyncyj w rzici wlote se aji zaśpiywajóm a zagrajóm na hóślach - to je czysty folkor.

A jak jakisi Górol wylezie na scynym a zagro a zaśpiywo a posłóchajóm go letnikorze, kierzi sie prziszli tak yny na niego podziwać, to wtynczas to ni ma folklor, bo óny uż sie nie czuje tak dobrze jak miyndzy swojimi - to je wtynczas folkloryzm.

Tóż niech ta naszo szumno cieszyńsko rzecz bydzie takim żywym folklorym, kiery powstowo spóntanicznie jak my sóm miyndzy swojimi. Tak samo je na tych rostomajtych kónkursach gwary, bo ci co wylezóm na scynym a wyrzóndzajóm po naszymu, uż nie rzóndzóm tak, jako na każdo miyndzy swojimi. Tóż ni ma co na siłym rzóndzić tam, kany sie człowiek nie czuje swobodnie.

F.J. Dral czyta opowiadanie Anny Filipek "Przed świętami":









Szpacyrkiem po Cieszynie, DZ w Cieszynie 22.04.2011










POLECAMY: Kącik gwarowy Fryderyka Jana Drala
Komentarze: (34)    Zobacz opinię czytelników (0)    Dodaj opinie
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.

Roztomili Ludkowie, jak tak se czytóm tóm Waszóm zacietrzewiónom prawicowo – lewicowóm dyskusyje, budzi sie wy mnie ślepo zowiść. Zazdroszczym Wóm tej pewności przekónań, bez rozdziołu, czy prawicowych albo lewicowych. Joch nigdy ni mioł stabilnych poglóndów. Już żech Wóm kiedysi pisoł, jaki był zy mnie polski patryjota rodym ze Załolzio, ale jyny do czasu, kiedy żech 6 roków miyszkoł w Polsce. Ani z wiaróm to nie było inaksze. Nejwiynkszy cios uciyrpiała moja dzieciynco religiność – zgodnicie kaj – na lekcjach religii. Roz po Bożym Narodzyniu sie pyto farorz: „A byliście wszycy w kościele?” Ze skorszych lekcji żech se pamiyntoł, że sie nie śmiy cyganić, tóż żech sie hned przigłosił, stanył w ławce i prawiym: „Joch nie był”. Ani żech stować nie musioł, boch takóm dostoł w pysk, żech sie hned spatki siednył. Jak żech już przestoł beczeć, zaczyłech rozmyślać. Je to moja wina, bo jak bych starczył powiedzieć, że na świynta nasuło u nas śniegu po rzić, a jo miyszkoł na samocie, skónd na autobus było pół godziny pieszo a do kościoła godzine, isto bych nie dostoł po pysku. Ale z drugi stróny żech wiedzioł nejmyni ło trzóch kamratach, co też nie byli w kościele, ale sie nie prziznali. I po pysku nie dostali. Uznowóm, że u prawdziwego chrześcijana by jedna facka za wiare isto wzmocniła religijność. U mnie sie stało inaczy. Nó, a nakóniec bardzo źle dopało aji moji polityczne łoriyntowani. Kiedysi mi była sympatyczno lewica, boch z religije pamiyntoł, że dlo tych je Królewstwo Niebieski, co nie siejóm a żniwo zbiyrajóm, jak to ptactwo boże. Tóż nie sioć a zbiyrać by sie mi podobało. Ale w kościele prawili, że bolszewicy, kierzi by też radzi jyny zbiyrać a nie sioć, pujdóm wstyscy do piekła. Tóż żech nie chcioł być bolszewik. Żeby prawicowiec? Ale prawicowcy chcóm zbogatnóć a pón Jezus prawił cosi ło bogoczach, łuchu igielnym i wielbóndzie... Tóż jako to je do pieróna? Żebych był liberoł? Ale liberołowie sie zastowajóm homoseksualistów a w kościele fórt prawióm, że to je nejgorszy grzych. Bo miłować Łojca Świyntego, to ja, ale Emila ni. W tej chwili mi moja ciekawsko baba zaglóndo przez ramie i prawi: „Tóż chwała Bogu żeś je aspóń w tej jednej łoriyntacyji pewny”. Wpadóm w głymbokóm zadume...

Na tywoim mjejscu sawa zmjynił bych pastwisko jak trowa nie szmakuje a nie ryczoł jak baran.

Ty fort naokolo o tym samym. Toż powjydz, nie zapłacił ci jakisik prywaciorz , mosz uraz do kogoś , to rzekni mu co cie boli.Ale nie pisz o wszystkich prywaciorzach boś nima w porządku. Jo też nie piszym o robotnikach co bumelujom, fuszerujom roboty, okradajom pracodawcem, piszom donosy, pijom na robocie -bo to margines.Czymu zakładosz ,że prywaciorz to oszust? To niesprawiedliwe.70% gospodarki trzymo dziś sektor prywatny - trzymo i pomimo ,że tak moc fabryk pozawjyrali ,weźmy choćby taki Cieszyn to jak sie okazuje nima tak źle . Weż sie do roboty idź otwórz firme bydziesz prywaciorzym ,ja zawjeszym pendzyj i cosik u ciebie dorobjym. Poradzisz wząść sprawy do wlasnej gorći i chycić sie roboty. Wtedy twój punkt widzynia sie zmjyni bo jak prawjom zależy z kierej strony sie mo ogląd na sprawem. A kiery to dzisio robi we śwjynta prywaciorz? Gno cie kiery w niedzielem do roboty a w śwjynta? na jo bych nie robił- zmjyniłbych prywaciorza a nie pisoł pierdół. Nima cie gańba? Dobrze ,że już ty poski wybiłech ci z glowy, .że komuny nimosz rod, mom nadzieje ,że oprócz "wyklęty powstań ludu zymi" cosik inkszego poradzisz jeszcze zaśpjywać. Wilków raczyj jest mało i jego natury nie zmjynisz zawsze zeżre owcem-raczyj łowca niech nie bydzie baranym a pastyrz niech sie nie okarze pastuchym ale mosz wybór nie musisz robić kaj ci sie nie podobo -wjysz ,że je wolny rynek pracy.

wrsie no i widzym ,że dochodzisz do szczytu choć nałokoło, ale kiesi dondziesz. Mnie też je jedno kto rzondzi ( tylko nie kaczyna)i fajne jak wszyscy robiom i majom zapłacone za szychte tyle ile sie należy podle powiedzynio:... wilk syty i owca cało... w przeciwnym razie bydymy śpiywać wyklęty powstań ludu ziemi...

wrsie rzeknym ci szpatnie bulczysz jak dupa w mydlinach. Jo nie chcym żeby wrociła komuna ( żech ci godoł, żech jom som zwalczołech)Prywaciorz tyż nie musi przeca wypisywać posków ,ale płacić nalezycie robotnikowi POWINIEN, jak robi nadliczbówki po 8 godz-50% w niedziele i święta 100% i tak aby państwo tyż miała z tego zysk w postaci podatku od zarobionego grosza, a nie co dzieli sie prywaciorz z robotnikiem łomijając fiskusa. Płaci mu najmniejszą stawke do ZUS a potym sie dziwiom że tako mało emerytura . Pamiętoj ,każdo robota mo swojom wartość i ty jako prywaciorz uszanuj tego bo cie braknie w kierymsi miejscu.

A tak nawiązując do aktualnej sytuacji polityczno społecznej -to np. przeciętni Amerykanie mają gdzieś politykę i jest im ganc obijętne kiery rzadzi po wyborach wszyscy bierom sie do roboty i nikt już nie prawi ,ze je demokratom czy republikaninym do momentu jak ropa nie podrożeje -teraz kosztuje o dolara wjyncyj niż przed rokiem -i prawiom obecnej władzy dowidzynia- szczyńści upatrujom w litrze paliwa do swoich aut a konkretnie w jego cynie. To tylko u nas a GC jest tego żywym przykładem toczy sie bez przerwy kampania wyborcza zwolenników PO czy PIS i wmawia się przeciętnemu obywatelowi ,że jego szczęści bydzie zalezec od tego kiery bydzie rządził. Portal onet.pl kazdy codzienny artykuł w czołówce mo poświęcony szkalowaniu wizerunku Kaczyńskiego- robi to z żelaznom konsekfencjom co mnie jako człowieka apolitycznego głownie z powodow praktycznych odrzuca od obecnie rządzących gdyż widzę w tym ogromną manipulację opinią społeczna.I to przeświadczenie tych kręgow ,że jest ona możliwa budzi we mnie odrazę i zapowiada zagrożenie swobód demokratycznych -głownie za sprawą tych ktorzy dopuszczają sie tej manipulacji a to szczęścia nie zapowiado.

Stelok ,to je proste i myśl prosto -nie starej sie wszystko przefulać i zawinyć.Szyńści jest możliwe w każdej sytuacji a aspiracje zależne od możliwości - oto przykłady; dwacet chłopów stoi w Afganistanie pod murym- dewatnoście rozstrzylali a dwudziestego ni - łon prawi mom szczyści zachowołech życi, nastypny przykład sześć chłopów mo zamiar grać w pokera o kase.Ale pięciu siado z nich tylko do gry. Sztyrech przegrowo jedyn wziął wszystkom kase- prawi mom szczyńści wygrołech, tyn co nie groł prawi mom szczyńści bo żech nie przegroł, w kioncyntroku wjyńźniowie odliczają do pięciu- co pjąty idzie do komory gazowej- inni uszli z życiym- som szczyńsliwi, i co mają ty zdarzynia do systymu politycznego - nic ,co mo do tego interakcja socjalno Ty wjysz o czym ty mówisz? A teraz przyjdźmy do tej Twoi demokracji- jak widzisz w polityce obowiązuje wahadlo - kiery przegnie za moc na lewo to spora grupa elektoratu pcho to wahadlo na prawo liczac ,ze lewicowe aspiracje najlepi poskromi prawica i tak sie to toczy od dziejów- wjynkszość ludzi mo gdzieś ty podziały- patrzi swoigo i dowo pozór czy ktoś pchając to wahadlo w kierunku ekstremalnym nie chce ich zniewolić- zbyt silno wladza zawsze stanowi zagrożyni do przeciętnego obywatela - dlatego umiar we wszystkim jest najlepszy- co już dawno tymu odkryli rzymianie. Abstrachując od polityki i demokracji niezależnie od systymu kazdy kowolem jest swoigo szczyńscia i jest mozliwe w każdej nawet najbardzyj podlej sytuacji -niekoniecznie w bardzo dobrym demokratycznym systemie politycznym.

Warsie, żodyn sóm sobie szczynścio nie zapewni, do tego je potrzebno interakcyja socyjalno, kiero je tym lepszo, czym lepszy je system polityczny. Jak bydziesz żył w kraju, kaj wiynkszość ludzi chodzi odulóno i nasmolóno, dziwo sie szuro na drugigo człowieka, mo problym ze zapewniyniym podstawowych spraw jako miyszkani, wyżywiyni, odpowiednio nauka, opieka medyczno czy bezpieczyństwo na ulicy, to sie to jakosi odbije i na tobie, choćbyś sóm do siebie nie dopuszczoł taki myśli i skupioł sie na swojim dobrym kowalstwie. Szczynści je relatywne jako pojynci, ale kónkretni ludzie mogóm w każdej chwili zadeklarować, na wiela sie czujóm szczynśliwie - niezależnie od "obiektywnych" danych. Jesi mo być dzisiejszo demokracyja założóno na wiynkszości, przi czym wiynkszość nima zadowolóno ze stanu teraźniyjszego, to nóm cosi nie funguje i trza rozmyślać, co i jako zmiynić. Sawa sie dziwo nazod, bo widocznie mu wtedy było lepij. Uczucia i wrażynia sie ciynżko wybijajóm z głowy twojimi argumyntami.

No widzisz steloku- to taraz se poczytej co żeś rychli napisoł.jo cie zacytujym ..."dycki lepszym systemym je taki w kierym bydzie wjyncyj ludzi szczyńsliwych"... A Twój nastympny post już raczyj to szczyńści relatywizuje -a zatym nimo łon związku z systymym politycznym ale należy do subiektywnych opinii ludzi kierzi to szczyńści definjujumi ich aspiracji- jedni do niego dąża wlasnym wysiłkiem i inni czekajom ,zeby im to szczyńści ktoś ofiarowol.

Sawa ,okropne drzystosz farmazony.Ale z jednym sie zgodzym- czlowiek sie uczy całe życi a furt je głupi do smierci.Głupi prawie nigdy o siebie nie powjy ,że je głupi jyno drugimu rzondzi ,że je głupi albo walnył gdziesik łepetynom. Tyś założył ,że robotnik mo mieć wjyncyj zapłacone i mo to mieć na posku. Ty by chcioł ,żeby isto każdy prywaciorz mioł sztab ludzi coby ty poski ludziom wypisywali. Zeby im tyn prywaciorz wybudowoł gmach w kierym by ustawił kupe biurek ,a zanimi posadził kupe bob ,żeby w godnych warunkach brali tam piniondze i robotnicy i te ksiyngowe co wypisujom ty poski. No to współczujym, strasznie mi cie żol.Słowym tynsknisz do posków, biurokracji, ale też isto do ciąglych podwyżek -a wjysz ,że zatym idom kolejki, fura pynindzy bez pokrycio ,puste półki w sklepach ,kartki na żywność no i ocet do nabycio bez ograniczyń.Za takim swiatym tynsknisz. Tynsknisz za światym gdzie demokracja kwitła jyny w gospodzie pełnej konfidyntów, tynsknisz do PZPR czyli kierowniczej siły narodu z wlasnymi sklepami, WUMLym, capstrzyków i pochodów pjyrszomajowych. To se ne vrati poza pochodami nic z minionych czasów ci nie zostało.

warsie widzym przeca ,żeś chyba na łepetyne upod i żeś je jednych z tych co lubiom rzondzić i je żeś prywaciorz. Pamiętej synku ,że i na takowych bydzie pora .W tym kochanym kraju nima demokracyji, ani kapitalizmu yno jakisi dziki zachód w ktoym prym wiodom tacy jak ty. Niech ci bydzie jondruś kiesi zmondzrzejesz na starość.

Ty mosz głowe wypchaną trybuną robotniczą.Ty isto robisz na gminie .Bo to z takom myntalnościom sie tam jeszcze znajdujom ludzie.Kazdymu wedle potrzeb- a wypłate sie dostaje przez głosowani. Widać najlepi żebyś dostoł robote na Białorusi a dali je już Korea Północno. Relacje miyndzy prywaciorzym a klientym są na ogół dwustronne i robotnika to niech nic nie obchodzi. Skąd ty wjysz co sie należy państwu a co ni. Ty jako robotnik układosz sie ze swoim pracodawcom- niech to byje i tyn prywaciorz. Spisujesz z nim umowe i dokadujesz sie za ile bydziesz tom robote robił. I on mom nadzieje cie płaci podle ni- jak żeś sie z nim dogodoł. Te relacje som też dwustronne. Jak jedyn albo drugi ich nie dochowuje to je po współpracy. Jak robotnik wtronco sie pomiyndzy pracodawcę a klienta to też je po współpracy. Już ci mówiłech ,że mosz mentalność lumpen -proletariackom. Ty byś chcioł być robotnikim ,kiery dyktuje pracodawcy jak długo mo robić, za ile i jak tyn pracodawca mo sie rozliczać z państwym. Jednym słowem Sawa chciołbś dyktat proletariatu a to już bylo i se nie vrati. Dyktatura proletariatu zbankrutowała. Teraz zachyncajom do brania sprawy we własne rynce. A ty furt myś innym po kapsach zaglondoł.

Stelok ,a co je to "szczyści".? Jako chcesz zmierzić to szczyńści?. I jako to chcesz zmierzić.?Mie zawsze uczyli, ze kowolem swoigo szczyścia je kazdy som. Sawa by chcioł ,zeby inni uczynili go szczyńśliwym- liczy na prezynt- i tu isto sie przerachuje.

Wy dwo niżyj: Toczycie nieskóńczóny spór ideowy myśli lewicowych z prawicowymi a myślicie, że jedno z tego na kóniec definitywnie wygro, ale sie obo przerachujecie. Dycki lepszym systemym je taki, w kierym bydzie wiyncyj ludzi szczynśliwych, i to je jedyno miara.

warsie ni mosz ganć racji, jo nie powiedzioł ,że ni może robić wiyncyj ,ale za wiyncyj musi mieć zapłacone godnie i na pasku aby państwo tyż miało z tego korzyść( podatek)wszyscy chcymy aby było lepi som tak prawisz toż dejmy też państwu to co mu sie należy,a nie prywaciorz to biere do swoi kapsy.

Toż ,jyny som prawisz jaki mo być prywaciorz a nie rzondzisz jaki mo być robotnik. Toz jako to -prywaciorz mo robić 12 godzin a jego robotnicy 8. To niech chladajom takom robote u inszego prywaciorza co mo takom robote jako im pasuje- na wolnym rynku Klient nie zmuszo prywaciorza do robienia jyny tego co mu warunki zlecynio nie odpowiadajom to go odciepuje i biere se inszego do tej roboty. Trefiła sie robota w kierej łon musi być z robotnikami 12 to takom robi- co se bydzie stawioł warunki klientowi? To klient se zebiere inszego prywaciorza a łon i jego chłopi bydom bez roboty i bez piniyndzy. W glowie mosz komunizm Sawa- ty byś chcioł robić u prywaciorza i stawiać mu warunki? Mało tego chciołbyś stawiać warunki klientowi -to ty nimosz za grosz oleju w głowie. Tyn prywaciorz nie dyktuje warunki zlecynio jyno rynek- klijent. Kapujesz. czymu też nie dziwosz sie ,ze ludzie mjyndzy sebom sie rózniom - robotnik robotnikowi nie jest równy a i prywaciorz od prywaciorza też. Polska byl i je nadal bjydnym krajym. Dobrobyt kraju jak i swoi rodziny buduje się przez lata i pokolenia. jedyn robotnik je szporobliwy inny łod samego rana rozglondo sie kaj by wypić piwo a wszystkim sie zdo ,ze majom miec po rowno. Jedyn o polske lepszom walczyl w gospodzie przi piwie a inszy na robocie robił po 12 godzin i nie dziwoł sie z kierej rynki mu placi prywaciorz i co byje mioł na pasku.

Warsie, szczynści je pojynci deklaratywne - jako głos w wyborach. Jesi sie w jakim ustroju czuje wiyncyj ludzi szczynśliwie, to je lepszy, niezaleznie od jego wyglóndu i pokroju. Problym je z tym, co kómu trzeba do szczynścio. Kiejsi mieli ludzie miynij rzeczy po chałupach niż terazy, a przeca ci dzisio wiynkszość z nich bydzie twierdzić, że mieli wiyncyj a lepij sie czuli. Z prostego powodu - sómsiod mo dzisio jeszcze wiyncyj, a ich mierzi, że óni sóm na tym gorzij. Inszy ci powiy - społym z francuskimi filozofami oświecynio - że pinióndze szczynścio nie dajóm i zadowoli sie wiynkszóm swobodóm obywatelskóm, kiero mu starczo. Jedyn sie raduje, że mo fajniacko płatnóm robote, drugigo tropi, że go óna nic a nic nie cieszy. Atyński Antystenes twierdził, że do szczynścia starczy być móndrym, a Adolf Hitler, że dlo każdego państwa je szczynści, kiej ludzie nie rozmyślajóm. Zależy, jakim je kiery kowolym.

Moja baba jak żech prziszel z wypłatom ani bardzo nie dała mi pojeść a już sie pytała o posek. Dziepro jak i żech tym poskym wyrtzazoł to przyszła po rozum do głowy. Taraz wjy ,ze chłopa mo szanowac, najpjyrw łobiod potym piniądze a posek jak już se o nim spomni to rozmyślo kiery posek wyjnym.

do warsa- jo bych sie nawet ganc z tobą zgodził ale pod jednym warunkiym: że prywaciorz bedzie szanowoł robotnika i bedzie mu płacił to co mu sie nalezy, robił bedzie też 8 godz a reszta jak koże PP nadliczbowki i to wykazane na listku a nie chowane do kapsy po cichu. Ni ma żech za socjalizmym ( boch som żech go zwalczoł),ale jakisi prawa robotnik musi mieć ,kapke mi szkoda że my som tak wyrychtowani przez kamratów co my z nimi walczyli o lepszom Polske.

Sawa ty mosz mentalność lumpen ploretariackom.A co ci tyn prywaciorz tak wadzi. Dowo takom robote jakom zegno i rozmyślo jak jom zrobić ,potym sprzedać ,chlopa zapłacić ,dac sztrof panstwu i żeby też i łon z tego cosik mioł. Nikt nie robi podle cyntralnego cynnika za z gory narzuconom cyne i bez rozmyślania czy jom sprzedo bo Rus zebroł wszystko- miech bez dna a ludzie mieli deli howno. Taki chcesz państwowej firmy?

Czas ucieko wartko a z nim pamjyć. Ludzie na wszystko zwyknom. Robota musi miec syns. I tamte czasy mialy też cosik dobrego ale mi ich nie żol ,moze tych roków byćh się snano pozbył i spleśnionych szkutów a tak to teraz żyje sie bardzyj prowdziwie.Jako se pościelesz tak też sie i wyśpisz-powjadajom.Cały żywot to dzisio bieg na długim dystansie.Nikt ci nie pojczo na szporowani. Musisz zarobić i jedno czy robisz na państwowym czy u prywaciorza -byle ,żeby ta robota była a trza se jom wożyć.

> fanzolicie ,to ty chromski smarkoczu eszcze mosz nocnik na dupie odbity ,a mlyko pod nosym łod matki i tak sie mądrzysz jak byś wszystki rozumy pozjodoł. Widac ganc głupigo co eszcze nie jodł dobrych wafli z Olzy,browar dycho pod skrzydłym Zywca ,a kup mi kaj piwo z Cieszyna,Celma to uż nima M-2, ani Celma to jakosi zbieranina,MOGYM CI SPRZEDAĆ AKCJE KIERE MI ZOSTAŁY Z CELMY. Cefana to były narzyndzia jak żes jechoł w trase a dołeś komu taowe reklamowe klyszcze to wszystko żes załatwił bo były rozchwytywane. Ty chromski bajtlu znondź mi kaj robote ,chyba u prywaciorza za marny grosz i łod rana do wieczora. Idź se do kościoła pożykać ło zdrowi bo rozumu uż ni mosz. WESOŁYCH ŚWIĄT

a ja leżę do góry brzuchem.... i się z was śmieję!

Olza, Polifarb, Celma, browar egzystójóm, sóm na plusie. Kiery je dobry, dycki zarobi. Kiery je do rzici, idzie z torbami. Chrómstwa za wielki pinióndze żodyn nie kupi. Werki pozawiyrali, werki kiere były do rzici. Mómy za to 20 razy wiyncyj sklypów, banków. Kiery chce robić, robote nóńdzie. Kierymu sie nie chce robić, tyn szczeko w internecie i chwoli komune abo Kaczyńskigo, komuniste religijnego, kiery robi ludzióm wode z mózgu, łobiecuje, co im do pinióndze za nic

Wiycie co .... były za kómuny 2 podobne fabryki Celma i Zelmer, z Celmy zostały ograbki, Zelmer urosnył i eksportuje, 2 fabryki z besztekami Polvid i Gerlach, s Polvidu mómy cosi dóma i nie bydzie wiyncyj, Gerlach mo sie dobrze. Była Olza z waflami, drażami i drugo tako Skawa w Wadowicach. Z Olzy została 1/3, po cieszyński marce ani śladu, Skawa Wadowice to dalij Skawa Wadowice i ludzi nie puścili s torbami, jak ta jedno torba i inni derektorzy cieszyńscy z bożej niełaski i partyjnego awansu, co pilnowali jyny swoi kapsy. Bez gańby, nienażrańcy. Zwykli ludzie u nas byli zawsze robotni i porzódniejsi jako kaj indzi, ale za cisi, by zaroz w 1990r wy....lić kogo trzeja ze stołków. I mómy ...

sŁUCHOJ NO BAJTLU JEDYN TE SE NIE NABIJOJ Z KOMUNY .Ganc to ni ma jedno,komuna czy kapitalizm,kiesi robiłeś bo musiołeś kiejby wyżyć ale jak żes chcioł tos załatwił wszystko,. Ni możesz prawić głupot bo kiedy sie bobudowało to wszechno co terozki Buzek z Krzakiym sprzedali. Prawisz ,że towaru w sklepach je moc ,ale to je sztucznie utrzymywane ,kiejbyrobotnik zarobił tele ile warto je je robota to by też nie było tela towaru. Teroski właściciel wyzyskiwocz nie płaci tela ile sie nalezy i robisz ni 8 godz ale 12-14, i tu mosz ukryty wskażnik bezrobocio. Robotnik haruje a na pyndzyj mało gdo doczko bo umiyro z wyciyńczynio.Spiywać każdy może lepiyj lub gorzyj wroć komuno wróćw wydaniu dzisiejszym

Godej kiery tobie dogodził.

Była komuna, to żeście gónili i skokali, że chcecie kapitalizmu. Dzisio gónicie i skoczecie, że chcecie komuny. Za komuny kożdy mioł robote, jyny za zarobióne pinindze nic nie kupił, bo nie było towaru w sklepie. Dzisio z robotóm je ciynżko, ale wszystko idzie kupić i je łacniejsze. Wiela za komuny stoło auto, telewizor, pralka ? Na dyć ludzie 20 roków na jedno auto robili. Szanujcie se to, co mocie

Wiycie tak czytom to co piszom poniektorzy to mi sie nóż w kabsie łotwiero,przeca to Buzek wszytcko sprzedoł a terazki nima co robić, a tak jak piszecie harapuci kupujymy z Chin to je dopiyro szmelc.Nie wiym czy pamientocie wafle z Olzy taki z miskiym co to była za uczta aż sie w gymbie same rozpuszczały nie to co dziśka sztuczne pieroństwa do tego dowajom, To je prowda ,że kiesi szło robić na trzy zmiany a terozki ani na jednom.Prywaciorz koże robić po 12-14 godzin ale na posku 8,jak tyn Tusk chce odbudować Polske.Nie chceli my tzw. "komuny" to momy teroz kapitalizm wyzysk,wpomnijcie se moje słowo kiesi zas wrocom te czasy co robotnik bedzie górom.

We Ostrawie pozawiyrali wszycki hawiyrnie, w Karwinie sprzedali Niymcóm. We werku w Trzyńcu robiło cosi 30000, terozki ani nie 5000. Taki sóm czasy. Chińczyk bydzie robił za półdarmo, cobyz nim wygrać muszymy robić wydajnie. W Celmie robiło 3600, z kierych 2500 sie obijało, podpiyrali ściany

Wy mocie oba dwa recht ale zdo mi sie.że tyn co prowadzi tyn kóntek gwarowy mo wjyncyj.Bo przeca nie idzie o to czy na fest zawrzili ty fabryki ale oto wiela tam teraz ludzi robi.Dejmy na to taki Zampol dalij robi to samo ale we Wodzisławiu i dalij z Cieszyna tam jeżdżóm rozmaite machery od rajfeszlusów.Tak jakby tego nie szło dalij robić w Cieszynie.I nie było to taki charapuci.A podziwejcie sie na nasz piekny banhof w Cieszyni.Cugi już ani do Bjylska,Skoczowa i Wiseł już downo nie jeżdżóm.A kiery kozoł zawrzić hawiyrnie w Kaczycach.Czy tym tyn fajny wóngiel to też było charapuci?Bo czechóm jakosi sie to godzi a my to mómy zawsze w rzici.Tacy my już sóm jakisi dziwocy w tej Polsce,że nóm sie nic nie opłaci a już za Olzóm poradzóm. Tak se mogymy to wszechno wypominać ale jeszcze w rokach siedymdziesiątych w samym Cieszynie robiło prawie dziesiyńćtysiyncy ludzi.Niewym ganc dobrzwe ale słyszołech,że w tej teraz nby Celmie robi 360 ludzi a kiejsi 3600.

Czasy sie mjyniom.Pamjyntom jak rano wczas ledwo sie rozwidnialo ludzie ze Zoru szli do fabryk.Wychodzili z blokowiska i tyrckali do roboty. Słychać bylo pomruk jak cosik rzadzili mjyndzy sobom. Taki pochod jaki dzisi idzie spozorować jak ludzie wyjdom z Kościola. Aut ani autobusow nie bylo, chodziło sie pieszo a kiery kupił se syrynem lub warszwę tyn był już pompón. Tata robił w Cefanie- robił tam 45 roków. Jak zaczynoł na PM-1 robił na oczkarce to norma byla na szychte 280 sztuk- kombinaczek. jak szeł na pyndzyj to furt robił na tej samej maszynie -tyle że norma byla już na szychtem 3800 sztuk. Jak zamieszkoł na Zorze to furt robił i furt szpanowali norme i furt nic nie bylo. U inkszych bylo tak samo.Łoni też robili i furt bylo mało. Norme źwigali i dźwigali. Jak już tata poszeł na pyndzyj to 10 roków jeszcze pożył- tyle ,że rynce mioł furt jeszcze zapuszczone łod oliwy z tego PM1 a szpony żech mu wyciągoł z gorci przez całom pendzyj bo mioł do śmierci na gorściach tak grubom skore jaki jo nimom dzisio na pjyntach. Wiesioło było -ale ludzie z tej roboty nic nimieli. Dzisio i wiela nima tej roboty ale jakosik sie mi zdo ,ze wiesiołości nima i żodyn by nie robił za medal, goździk i tytuł brygady pracy socjalistycznej. To już jyny w Chinach.

pjeruńsko ciulaste to mocie panoczku! chyćcie sie lepyij malowanio jajek!

Fryda, nie fanzolcie ! Fulocie łokropecznie. Celma, Polifarb i Olza produkujóm. Nie panoczek z ratusza ich pozwiyroł, jyny żodyn nie chcioł tego harapucio kupowaćza takóm cyne. Od Niemiec Wschodnich po Wyngry wszyndzi pozawiyrali fabryki z harapuciym. Nie podobo sie kapitalizm, mazej do Pólnocnej Korei. Bo na Kubie też bydóm werki z harapuciym zawiyrać

Dodaj komentarz

Zawartość pola nie będzie udostępniana publicznie.
  • Adresy internetowe są automatycznie zamieniane w odnośniki, które można kliknąć.
  • Dozwolone znaczniki HTML: <em> <strong> <cite> <code> <ul> <ol> <li> <dl> <dt> <dd>
  • Znaki końca linii i akapitu dodawane są automatycznie.

Więcej informacji na temat formatowania

Image CAPTCHA
Wpisz znaki widoczne na obrazku.
reklama
reklama