CO TYDZIYŃ PO NASZYMU: Trzeja dycki se dować pozór na czyjim gróncie sie stawio chałupe"Moja ty słodko cieszyńsko mowo być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Gdosi mi kiejsi prawił, że jak se postawiym chałupe, abo jakómsi inkszóm budem na cudzym gróncie, to łóna nie bydzie moja. Bo dycki tyn co mo grónd, mo wszecko to, co kiery na nim postawi, abo wygno do wyrchu jakómsi inszóm inwesztycyje. Ganc inakszyj je w miastach i na dziedzinach, bo dejmy na to, jak takim ajzynbaneróm piźnie do czepani puścić przez postrzodek dziedziny jakómsi sztreke, to łóna nigdy nie bydzie jejich. Dobrze jak tako sztreka idzie wyrchym po jakimsi moście i żodyn po ni nie drepsi, ale jak wali przez cestem to dycki ś nióm je łostuda. Dopadło to cieszynioków na Zamkowej, bo tam wedla tej sztreki, je dziura na dziurze i ni mo to gdo sprawić. Urzyndniki s rotuza nie poradzóm dać powolynio na zrychtowani tych dziur, a ajzynbanerzi przeca jeżdżóm cugym i im to nie zawadzo. Przeca jak tako damfula smyczy za sebóm wagóny, to łóne na tych dzirach nie hópkajóm, bo jadóm po sztrece. I taki to mómy dzisio dziwoki, bo jedyn ni może, a drugi mo dycki czas i dziury majóm sie fórt dobrze. Dziynnie stówki aucisków na tych dziurach hópkajóm, a tustelokóm zustało yno fluchcić na tego, kierego akurat majóm pod rynkóm. Drugo cesta s dziurami je na Trzóch Braci, ale też żodyn ji nie rychtuje, bo isto możne chybiło czegosi, czym by ty dziury trzeja było zasuć. A możne to je tak, że żodnymu to nie zawadzo, bo przeca jak na taki dziurze kierysi letnikorz głowe przipadnie, to chocioż bydzie mioł se co spóminać s tej nawszczywy w naszym Cieszynie. Dziura w ceście to je dycki łostuda dlo tych co chcóm przez nie przynś, abo po ni przejechać i skyrs tego trzeja dować na nie fórt pozór. Mini słownik: prawił-mówił, dycki-zawsze, wygno-wygoni, ganc-całkiem, dziedzina-wieś, ajzynbaner-kolejarz, sztreka-tor, piźnie-uderzy, cesta-droga, łostuda-kłopot, wedla-obok, hópko-podskakuje, dziwoki-śmieszne, fórt-zawsze, fluchcić-narzekać, chybiło-zabrakło, letnikorz-turysta, głowe przpaś-potknąć się, nawszczywa-odwiedzny, skyrs- z powodu Tóż miyjce sie wszedcy dobrze i wiesiołego popióntku
|
reklama
|
Dodaj komentarz