CO TYDZIYŃ PO NASZYMU: Tańcowani i śpiywani to je dycki procno wiec

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Zhóczoł na ziym

Kapke tego dzisio móm na głowie i nie wiym łod czego zacznóć. Nejlepszyj bydzie isto napisać, że zima prziszła i nasuło śniega, bo nie wiadómo kiedy przidzie mu na kóniec i tustelocy zapómnóm, że eszcze cosi taki biołego je we przirodzie. Ale zacznym łod sylwestra w kierym to tustelocy mieli przileżytoś pooglóndać w cieszyńskim tyjaterze, jak śpiywajóm i tańcujóm sómsiedzi z Ukrainy. Dołech sie przez mojóm na tyn szpektakiel w tyjaterze nahósować, bo do tańcowanio uż mómy za moc roków i lepszyj se przi takim hałdamaszu zeprzić zadek, choćby aji na ty dwie godziny. Powiym wóm, że nie bardzo to było worte tych piniyndzy co łoni pokozali, bo ani nie było na czym łoczy napaś, a jako to kiejsi nasi starzicy prawili kapsy nóm prziszło wypróżnić. Muzykańci, a tych było isto ze dwacet tak sie porozcióngali, że dlo tych co zwyrtali sie w tańcu chybiało placu. Jak sie blisko scyny siedzi we trzecim rzyndzie, to sie widzi wszecki felery szpektaklu i człowiek zaczyno rozmyślać po co tam prziszeł. Jednej s tych dziełuszek, kiere tam tańcowały fórt lekuśko dyrbało sie klepeto, a tymu co groł na basie, pulpit na kierym mioł nuty zhóczoł na ziym. Porem razy sie wszedcy przewlykali, ale nikierym to nic nie pumógło, bo to tańcowni i śpiywani fórt nie było worte tych piniyndzy. Jednymu ś nich, kiery prugowoł tak hrubo śpiywać, isto kierysi ukrod anzug, bo fórt na scynem wyskakowoł w tym samym kabocie i w tych samych galatach. Ni mioł też ani koszuli i ani żodnej westy, yno taki ćmawy podkoszulek do szpica i pasowoł by raczyj do disco polo, a ni do opery. Tak czy inakszyj pieknij we Trzóch Króli grały na rynku nasze “Sikorki” i orkiestra dynto “Cieszynianka”.

Mini słownik: kapke-troszkę, nasuło-nasypało, przileżytoś-możliwość, tyjater-teatr, nahósować- namówić, hałdamasz-zabawa, starzicy-dziadkowie, feler-błąd, fórt-ciągle, dyrbało- trzęsło się, klepeto-noga, zhoczoł- upadł, anzug-ubranie, kabot-marynarka, westa-kamizelka,

Tóż miyjcie sie wszedcy dobrze i wiesiołego popióntku.