CO TYDZIYŃ PO NASZYMU: Rozkazować to każdy poradzi, ale poschłóchać mało gdo

”...szpecyjalny gesztel...”

”...obiylóne na bioło”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Zwyrtać pedajlami

Doczkołech sie doś wartko tego, coby uwidzieć jak funguje ta nowo scyna na kolcach, bo w zeszłym tydniu uż zustała rozpostrzóno. Gónitwy było na ni co nie miara, bo kierysi mioł taki napad, coby nasze dziecka uczyć tam ekologije. Żodyn jednakowóż mie nie posłóchnył, coby te scyne przesmyczyć na drugóm stróne rynku i zrobić wygode dlo tych co siedzeli ze zadku. Myślym se, że isto sie im to nie podarziło skyrs tego, że padło na ekologije, kiero ni ma za tym coby zaprzóngać do woza traktory, a na pozoryńdziu kóni ni mieli. To był dziyń w kierym żodyn ni mioł jeździć autym, ale mało sie tym gdo przejmowoł i wszyndzi było pełno aucisków. To je dycki tak, jak sie yno kogosi pieknie pyto, coby był szykowny i posłóchoł co sie do niego prawi, a za to mu sie ganc nic nie płaci. Moc jednakowóz też je takich ludzi co majóm radzi jak sie im cosi koże, abo też sóm tacy, kierzy yny posłóchnóm jak sie ich pokutóm postraszy. Znaszli sie też na rynku tacy co moc zachwolali jeżdżyni na kołach i mieli tam taki szpecyjalny gesztel na kierym wisiało koło yno ze zicym, pedajlami i przednim wolantym. Przedni widelec i cały rómek był prziszrubowany do tego gesztela skyrs tego, coby szło yno zwyrtać pedajlami i nigdzi nie jechać. Jak uż żech doł pokuj tej ekologiji to prziszeł mi taki napad coby zozdrzić do postrzodka nowo zrychtowanego Domu Narodowego. Powiym wóm, że jak żech tam wloz to zdało mi sie żech je we szpitolu, abo w jakimsi modernym młynie. Wszecko tam je obiylóne na bioło: powoł, ściany, kraty i yno tej biołej farby chybiło na dłażki i schódki, bo isto werk w Marklowicach zasztrajkowoł.

Mini słownik:
coby-żeby,
funguje-funkcjonuje,
kolca-koła,
rozpostrzóno-rozciągnięta,
napad-pomysł,
przesmyczyć-przeciągnąć,
podarziło-udało się,
skyrs-z powodu,
dycki-wciąż,
pokuta-kara,
koło-rower,
zico-siodełko,
wolant-kierownica,
gesztel-konstrukcja,
zwyrtać-kręcić,
napad-pomysł,
dłażka-podloga,
werk-fabryka

Tóż miyjcie sie wszedcy dobrze i wiesiołego popióntku