CO TYDZIYŃ PO NASZYMU: Przegnać s miasta gołymbie to je procno wiec

”...siedzóm na Domie Narodowym...”

”...kiere szpacyrowały po dachu...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Do swojigo bachorza

Trwało to dłógi roki, coby rotuzowi prziszli na to, że lepszyj bydzie gołymbie nauczyć czytać niż zakazować ludzióm ich kormić. Eszcze nie wszecki gołymbie isto prziszły na to, że lepszyj bydzie dlo nich furknóć se dejmy na to do Bażynowic abo do Puńcowa, coby na polu pozbiyrać porem zornek na ścierniskach. Możne, że ty starsze uż na to prziszły, ale jak to wszyndzi bywo s młodziokami je dycki ostuda. Jak uż podarziło sie im poczytać te wielkóm tabule kiero stoji na rynku, to możne że też zozdrziły do interneta i dowiedziały sie, że pokruszónego chleba nie worce jeś, bo idzie s tego dostać żyrki. Po drugi, dycki je łacnij sie yno zegnóć po przirychtowane przez kogosi cudze żrani, niż samymu se go pochledać. Tak też to je s ludziami, bo nikierzi prawióm, że darmoche choćby odchorować to zjeś trzeja, a nuż sie nóm podarzi i nie nóndymy sie we szpitolu. Tóż też dzisio isto skyrs tego widać wiyncyj tych gołymbi, kiere siedzóm na Domie Narodowym i rozmyślajóm kaj i w kierom stróne furknóć, coby naciś zdrowego jedzynio do swojigo bachorza. Dwa tydnie tymu widziołech też taki wielki gołymbie, kiere szpacyrowały po dachu naszego zamku, ale ni miały skrzideł. Łóne tam isto wylazły po drabinie, bo inakszyj by przeca tam sie nie dostały razym s tym plechym, kierym obkłodały tyn dach. Gónili wartko po tym dachu, prawie jak ty prowdziwe gołymbie, bo prziwiónzani byli takimi modrymi porwozami, coby se krziwdy nie zrobić. Shóczeć s dachu i połómać se swoji klepeta to je rychlij niż nowe bóty i skyrs tego trzeja sie dycki dobrze do czegosi prziwiónzać.

Mini słownik:
rotuzowi- urzędnicy,
isto-na pewno,
furkać-latać,
zorko-ziarenko,
na to prziś – wpaść na to,
dycki-zawsze,
ostuda-kłopot,
podarziło sie-udało się,
zozdrziły –popatrzyły,
nie worce- nie warto,
żyrka-ból brzucha,
łacnij-taniej,
żrani-żarcie,
pochledać-poszukać,
tydnie-tygodnie,
plech-kawa,
shóczeć- spaść,
skyrs- z powodu,
klepeta-nogi,

Tóż miyjcie sie wszedcy dobrze i wiesiołego popióntku