CO TYDZIYŃ PO NASZYMU: Prowdziwy strómek dycki fajnie wóniobyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio żech se tak porozmyśłoł, jako by to było i coby rzekli nasi kamraci i kamratki, kierych uż dwno ni ma miyndzzy nami, jakby tak naroz stanyli na rynku w Cieszynie. Nikerzi isto by se myśleli, że czas sie zahaltowoł i stoji w miejscu, bo świónteczny strómek na rynku, na kierym je pełno baniek i pore maszek fórt je taki sóm. Kiery se zrobił łóńskigo roku fotke na rynku, abo eszcze nieskorzij, to poradzi jóm posłać swojim przibuznym aji dzisio i żodyn sie nie skapnie, że łona je staro. Isto tyn strómek moc kosztowoł i trzeja go bydzie eszcze tam łoglóndać możne aji ze sto roków. Dobrze by było postawić tyn plastikowy strómek na inszym placu, a kansi w jakisi gojce ucipać prowdziwy i postawić go na postrzodku rynku. Bo jak tak dalij pudzie, to dzisiejsze dziecka jak sie zestarnóm, to fórt przed łoczami bydóm mieć tyn sóm szpiczaty plastikowy strómek i przidzie im isto s tym widokym umrzić. Farbe tyn strómek mo jakómsi ćmawóm, kiero nie bardzo je podobno do prowdziwych smrekowych jegieł i na tej zmazanej kostce na rynku ani go bardzo nie widać. Pół biydy jak napadze chocioż kapke śniega to go widać, ale jak go ni ma, to yno ku wieczoru jak je cału rożnionióny, to ciepie sie na łoczy. Za nikierymi auslagami widać moderne świónteczne strómki, kiere sóm posztrajchowane na bioło. Możne by też było dobre, jak ni ma śniega, taki bioły strómek postawić na rynku a na nim powieszać czorne bańki. Tak nóm chybio porzóndnych atrakcyji dlo letnikorzi, że taki napad s biołym strómkym może by ich do nas naskludzoł i wypróżnili by se u nas s piniyndzy swoji szrajtofle. Mini słownik: kamraci-koledzy, nikierzi-niektórzy, zahaltowoł-zatrzymał, strómek-choinka, bańka-bombka, fórt-ciągle, nieskorzij-później, przibuzny-krewny, kansi-gdzieś, uciupać-urąbać, ćmawy-ciemny, zmazane-brudne, kapke-trochę,auslaga-wystawa, posztrajchowane-pomalowane, rożnióne-zaświecone, chybio-brakuje, letnikorz-wczasowicz, napad-pomysł, naskludzoł-przyprowadził, szrajtofla-portmonetka Tóż miyjcie sie wszedcy dobrze i wiesiołego popióntku
|
reklama
|
Dodaj komentarz