CO TYDZIYŃ PO NASZYMU: Prowdziwe pinióndze zarobio sie yno we werkach

”...zileźno szruba...”

Dzisio miało być ło tym skónd sie bieróm w Cieszynie prowdziwe pinióndze, ale szpacyr po Hażlaski doł mi taki napad, coby też ło ni cosi napisać. S tymi pinióndzami to je tak, że starsi tustelocy se fórt spóminajóm, wiela to było kiejsi werków, kiere robiły rozmajte wieca do przedanio. Rozchodzi sie ło to, że jak sie wyprodukuje jakómsi wiec kieróm zaroz poradzi sie przedać, to za to mo sie prowdziwe pinióndze. Tych werków tustelocy kiejsi w Cieszynie mieli tela, że nie wiedzieli se w dupie wrotu w kierym by se znónś robotem. I fórt nie wiym jako to było, że kszeftów mieli my s dziysiyńć razy mjynij niż dzisio, a ludzie do nich tak nie gónili, coby zaróbióne ty prowdziwe piniódze tam udać. Dzisio werków je isto s dziesiyń razy mjynij, to niech mi kiery powiy skónd tustelocy bieróm prowdziwe pinióndze. Przeca to sie tak nie do, coby jedyn drugimu fórt cosi przedowoł i na tym mioł kszeft, bo przeca tyn piyrszy musi dzierżeć w gorści naprowde kansi zaróbióne ty prowdziwe pinióndze. A teraz kapke o Hażlaski na kierej fórt stojóm uż przeszło pińdziesiónt roków, ty same szure drzewiane słupy, na kierych wiszóm przerozmajte dróty. Dyndajom łóne we wszecki stróny, jak na nich duchnie jakisi wiynkszy wiater i yno czakać, aż kierysi ś nich obali sie na ceste. Jedyn stoji uż taki szury, że trzeja rzykać, coby sie nie obalił i nie było s tego jakigosikej nieszczynścio. Zieleźno szruba, kiero dzierży tyn drzewiany słup uż je tak zardzowiało, że praskła s jednej stróny i nie wiym, czy jak to poczytocie, to tyn słup ło kierym je rzecz nie bydzie leżoł uż na ceście, abo na dachu jakigosi auta. Rzykać też trzeja, coby nie zgruszoł kómusi na czepóń.

Mini słownik: napad-pomysł, fórt-ciągle, werk-fabryka, wieca-rzeczy, kiejsi-kiedyś, kszeft-sklep, dzierżeć-trzymać, szure- krzywe, wiater-wiatr, kierysi-ktoś, cesta-droga, rzykać-modlić się, praskła-pękła

Tóz miyjcie sie wszedcy dobrze i wiesiołego popióntku