CO TYDZIYŃ PO NASZYMU: Podle zygora ludzie wszecko robióm

”...na ni zygorów...”

”...trzepie szmacianymi chwolidłami...”

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Krymowy puc

Całe szczynści, że fórt kierysi mo w czepani, coby cosi gupigo wynochfić i skyrs tego isto do kóńca świata i jedyn dziyń delij bydym móg cosi o naszym mieście napisać. Kóńczy sie stawiani tej naszej galeryji STELA i uż widać, że czegosi bydzie na ni za moc, a cosi bydzie niedorobióne. Za moc to na zicher bydzie na ni zygorów, bo przeca dzisio uż żodyn nie dźwigo łoczy do góry coby sie podziwać na rotuz, na kierym je zygor. Każdy mo przeca na rynce małe godzinki, a ku tymu aji w talefónie też. Tóż też tymu nie rozumiym skyrs czymu na ni bydóm aże dwa. Tak rozmyślóm nad tym i nic mi móndrego nie przichodzi do czepani, chyba yno to, że isto bydóm mierzili czas jak dłógo kiery tam u nich pozbywo sie piniyndzy. Możne też ty zygory bydóm pinkać, abo głośno zwónić porem minut przed zawrzicim, coby uż do nich tam żodyn nie wlazowoł i nie robił im ostudy. Kiery mo dobre łoczy to isto roz dwa też uwidzi jaki hymboły mo tyn krymowy puc na tej ścianie od stróny wiaduktu. Jak sie słońce na ni sie łoprze to idzie uwidzieć, że kierysi dóma isto zapómnioł rajbetke i gołymi ryncami rajbowoł tyn puc. Możne, że je to tako dekoracyja, ale nie bardzo w to wierzym. A możne je to przirychtowane pod rozmajte chwolidła łod kszeftów, kiere sie tam zainsztalujómi ty hymboły sie wartko pod nimi stracóm. Na mieście uż łod zeszłego tydnia kaj sie yno człowiek obróci to wiater trzepie szmacianymi chwolidłami na kierych idzie uwidzieć wyśmiote gzykty tusteloków, kierzi dostali chynci piyńć roków regirować s rotuza tustelokami. Czy sie im to podarzi tego nie wiym, bo chyntnych je wiyncyj niż placu w rotuzie

Mini słownik: fórt-ciągle, czepań-głowa, skyrs- z powodu, delij-dlużej, na zicher-na pewno, podziwć-popatrzeć, rotuz-ratusz, godzinki-zegarki, zawrzici- zamknięcie, wlazowoł-wchodził, ostuda-kłopot, hymboły-nierówności, puc-tynk, rajbetka –deseczka do tynku, gzycht-twarz, regirować-kierować, podarzi-uda się

Tóż mjyjcie sie wszedcy dobrze i wiesiołego popióntku