CO TYDZIYŃ PO NASZYMU: Fórt mómy rozmajte pinióndze po łobu strónach Olzy

...Zadzierżowoł sie ś nimi...

...jakisikej studio Luiza...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Kapke ludzi do grómady
Ni ma tydnia, coby sie cosi zaimawego nie podarziło w naszym pieknym mieście. Zeszłóm niedzielem taki jedyn młody szykowny panoczek zegnoł kapke ludzi do grómady, coby im pokozać kieryndy hańdownij tyrckoł sie po Cieszynie austryjacki tramwaj. To pokazowani nie zacznył łod banhofu w Czeskim Cieszynie s pod kierego kiejsi łón sztartowoł, bo uznoł, że cało ta czelodka, kieróm podarziło sie mu zegnać do kupy nie dóndzie ku szpitolu w polskim Cieszynie. Nie wiym jako na to prziszeł, ale możne isto tymu, że dobrze wszeckich poglóndoł i uznoł, że ty paniczki i panoczkowie majóm na tela moc roków, że tam nie dóndóm. Zadzerżowoł sie ś nimi tam kaj kiejsi były przistanki i aji tam kaj spod pucu na ścianach chałup eszcze wystowały hoki, do kierych prziszrobowane były dróty ze sztrómym. Tustelocy sie dowiedzieli, że tyn tamwaj jechoł yny dzisiyńć minut, ale to stykło, że poradzioł przewiyś na rok prawie milijón ludzi. Nejwiyncyj jeździło ś nim wojoków, kierzi wsiadali przed banhofym i jechali ku szpitolu, łod kierego do kasarni mieli uż yny kónsek. We dwacatym roku zeszłego stulecio prziszło mu na kóniec, bo jak przer-zli Cieszyn na poły to Czesi s Polokami nie poradzili sie dorzóndzić jakimi pinióndzami trzeja bydzie płacić za bilety. Kapkech ś nimi wymor-z i uż dzisio małoś nie wiela zustało mi chynci do szpacyrwanio dalij po tej Mynniczej, przi kierej żech sie zeszły tydziyń zastawił. Dzisio stojym pod nomerym dwa a sztetrycet w kierym je jakisikej studio Luiza i nie wiym skyrs czymu mianuje sie to studjym, ale prziszło mi cosi do czepani, że isto tyn, co tam mo tyn kszeft je po studiach.

Mini słownik:
zaimawy–interesujący,
kapke-trochę,
kieryndy-którędy,
banhof-dworzec,
podarziło-udało się,
dóndóm-dojdą,
zadzierżowoł-zatrzymywał,
kaj-gdzie,
puc-tynk,
sztróm-prąd,
cug-pociąg,
kasarna-koszary,
kónsek-kawałek

Tóż miyjcie sie wszedcy dobrze i wiesiołego popióntku