CO TYDZIYŃ PO NASZYMU: Dzisio s przekludzanim ni ma żodnej łostudy

...dzierżóm w rynkach plakaty...

...zrobić sztympel...

Tyn tydziyń uż żodyn po Cieszynie nie maszyrowoł i skyrs tego nie bydzie ło czym pisać. Za to dziynnie stojóm po połedniu na Cieszyńskim Rynku kolem Floriana, rozmajci tustelocy i dzierżóm w rynkach plakaty, a jedyn panoczek mo aji na drzewianym kuliku wielkóm fotkem. Eszcze ze zaimawych wiecy, kiere w tym tydniu sie przidarziły to je zawrzici na pore dni jednej cesty na ulicy Korfantego, coby na ni postawić dźwig. Był cały czyrwióny i s daleka było go widać tak dobrze, coby żodyn do niego nie wderził. Przehópnymy dzisio zaś dalij na ulicem Menniczóm pod nomer dwi a sztyrycet coby obezdrzić jak zachwolo sie jedyn kszefciosz s komputrami i telefonami. Dwa chwolidla mo prziszrubowane wedla dwiyrzi, a tyn nejwiynkszy kapke wyżyj nad łoknami. Przed nim też pod tym samym nomerym yno s literkóm a, poradzymy se kupić rozmajte szruby i szrubki, a ku tymu aji alumuniowe tabliczki. Kapke dalij je szyld łod studia ło kierym łostatnio była rzecz, a pod nim przirażóno je informacyja o warsztacie, kiery poradzi wóm zrobić sztympel aji za godzine. Problym je yno w tym, że łóni tam s tela sie przekludzili do Goleszowa i coby tyn sztympel mieć zrychtowany za gdzine trzeja sie tam bydzie do nich przeszpacyrować. Bydymy mieć przi tym zaroz dwa w jednym, bo taki szpacyr ku Goleszowu przido nóm kóndycyji, a po drugi znóndymy do godziny w naszej kapsie nowy sztympel, kierym bydymy sie mógli pochwolić przed znómymi. Podziwejcie sie jakóm mómy dzisio wygode-odewrzymy firme, a uż za godzine bydymy poradzieć sztymplować wszecki firmowe papióry.

Mini słownik:
skyrs- z powodu,
kulik-kołek,
wieca-rzeczy,
zawrzici-zamknięcie,
cesta-droga,
wderził-uderzył,
przehópnymy-przeskoczymy,
wedla-obok,
kapke-trochę,
poradzymy-potrafimy,
przirażóno-przymocowana,
przekludzili-przeprowadzili,
zrychtowany-zrobiony,
sztympel-stempel.

Tóż mjyjcie sie wszedcy dobrze i wiesiołego popióntku