CO TYDZIYŃ PO NASZYMU: Coby nie przeziómbnóć trzeja sie dycki dobrze oblyc

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Coby nie uśli

Robiłech błozna s tej zimy i kierysi isto ji to rzeknył, bo dzisio mómy za swoji. Cały tydziyń marzło jak diasi i wszedcy tustelocy zaobleczóni szmatłali sie po cestach. A pod bótkami tak jak kiejsi szkwiyrczoł śniyg, że iś było biyda. Pół biydy, że to nie bydzie trwać wiecznie i wiosna przidzie, coby zaś na szpacyr szło iś bez mycki na czepani, a mantel zawiesić w odmaryji. Kiejsi jak marzło to na budowach sie nic nie ruszało, bo taki był betón, kiery by w gruntach nie stwardnioł. Dzisio uż je tako nwoczesnoś, że żonyn sie ło to nie staro i na budowie tej naszej “Steli” robota idzie dziynnie, aże do samego wieczora. Dziynka tymu żech spozdrził, że światło uż rożli na tym nowym autobusowym banhofie, bo przeca łod czegosi przekazowani tej chałupy tustelokóm musieli zacznóć. Uwidzieć też tam idzie uż porem przirażónych szybów do tych betónowych słupów, na kierych wisi lekuśko spadzisty dach. Jakosi żodnymu nie szkoda tego światła co fórt całóm noc świyci, bo isto ci co go rożli, za niego nie płacóm. A możne je to rożnióne dlo tych tusteloków, coby nie uśli jak se tam siednóm na tych nowych ławkach. Coby uż mieć tyn szpacyr po Mynniczej za sobóm, to dzisio zacznymy od nomera sztyrycet, kaj idzie trefić na wielki zielźne dwiyrze na kółkach. Skyrs czymu łóne nie sóm posztrajchwane tego nie wiym, ale sie mi zdo, że możne chybiło im piniyndzy na farbem. Abo możne tymu, że tyn plech na tych dwiyrzach je tak hruby, że durch nie przerdzowi do kóńca świata. Że to ni ma piekne to isto im to nie zawadzo, bo przeca idzie yno ło to, coby nie robiły łostudy przi otwiyraniu.

Mini słownik:
błozna-żarty,
kierysi- ktoś,
jak diasi-jak diabli,
szmatłać się-powoli dreptać,
cesta-droga,
czepań-głowa,
mantel-płaszcz,
odmaryja- szafa,
grunta-fundamenty,
spozdrził- zobaczył,
banhof-dworzec,
rożnóć- zapalić,
fórt- ciągle,
uśli-zasnęli,
skyrs- z powodu,
plech- blacha,
durch-zupełnie,
łostuda- kłopot.

Tóż miyjcie sie wszedcy dobrze i wiesiołego popióntku