CO TYDZIYŃ PO NASZYMU: Balóny mómy rozmajte, bo aji idzie s kogosi zrobić balóna

Rozmajte dziwy w tym naszym mieście tustelocy wynochwiajóm, że łod tego aże w czepani sie zwyrto i nie wiadómo coby tu napisać. Dejmy na to, dwa tydnie tymu ku wieczoru lecioł w lufcie czyrwióno- zielóny balón, kiery ło mało co nie zahoczył ło nasz szpitoł. Kierysi gdo kierowoł tym balónym, to nie bardzo mu sie to podarziło, bo było widać, że wiater go nie posłóchoł. Gnoł go ku Ustróniu, a możne aji ku Skoczowu , bo je to isto procne kierować takóm banióm s wiklinowego kosza, jak wiater żynie go kaj chce, a skrzideł ani śmigła to ni mo. Kaj go tyn wiater zażynył tego nie wiym, bo ło tym żodyn nie pisoł, ale tela chocioż mu sie podarziło, że wszedcy co dzwigali łoczy do góry widzieli to wielki 50/ pińdziesiónt /, kiere mioł na tej czyrwiónej strónie napisane. Reszta była uż takimi maluiśkimi litrami napisano, że isto yny ci, co to tam przirazili wiedzieli ło co rzecz idzie i kogo i czym chcieli sie pochwolić. Dwa tydnie tymu szło też uwidzieć jak na na postrzodku rynku jedna szykowno paniczka ukazowała tustelokóm jako sie wygibać, coby rozruszać swoji kości. Było to moc zajimawe, bo wygibali sie tam społym s tustelokami aji Czesi, kierzi chcieli też pokazać co poradzóm i przelecieć sie, abo przejechać na kole przez nasz Euroregion Śląska Cieszyńskiego. Ale to eszcze nie było wszecko, bo na rynku, kinomani postawili takóm kostkatóm czornóm kiśnie na kierej namowiali wszeckich do obezdrzynio kina na “Granicy”. W Cieszynie na granicy było uż wszecko, a kiejsi aji dróty, kiere zawadzały ludzióm, coby nie wlazowali do Olzy. Dzisio tak uż to je s tóm granicóm rozegnane, że aji kino znaszło se plac w Olzie.

Mini słownik:
wynochwiać- wydziwiać,
czepań –głowa,
zwyrto-obraca,
luft-powietrzze,
podarzić sie-uda się,
żynie –gna,
kaj-gdzie,
zażynył- zagnał,
isto-pewnie,
przirazić- przitwierdzić,
społym-razem,
koło-rower,
kiśnia-pudło,
obezdrzić-obejrzeć,

Tóz miyjcie sie wszedcy dobrze i wiesiołgo pipióntku.