CO TYDZIYŃ PO NASZYMU: Wypłowiały papyndekielPOZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym. Kole tej naszej poczty ło kierej była zeszły tydziyń rzecz, nie poradziłech stanóć i dziynka tymu ciepła mi sie na łoczy "Ciemna strefa" jako gablotowo ciekawostka. Ło co sie rozchodzi s tóm strefóm żodyn isto nie wiy, bo ta kartka s tóm wiadómościóm je przirażóno do gablotki, do kierej sie żodyn nie prziznowo. W postrzodku tej gablotki wrażóny je jakisi stary wypłowiały papyndekiel, a rómki uż mo całe oblezióne s farby. Yno doczkać aż sama s tej ściany odpadnie i gruchnie sobóm ło ziym. Kapke dalij mómy eszcze jednóm nowość, a je to atelier restaurant Kusa Sushi. Co ci ludzie uż nie wymyślóm w mianowaniu swojich kszeftów, coby yno ludzi do sie nagnać to aji naroz gspode poradzóm nazywać atelier.Tak czy inakszyj aji w Cieszynie uż pomału budujymy drugóm Japonije i zaczynómy łod surowego miynsa s ryby zawiniónego w trowe. Ku tymu eszcze ni majóm tam odewrzite w pyndziałek, bo isto prziszli na to, że po niedzieli tustelocy ni majóm bachórza przirychtowanego na te nie usmażónóm, ani na nie uwarzónóm rybe. Kapke dalij, zaś sie nóm namietła jakosi filija banku, kiero mo za auslagom na chwolidle mały szyf ze żaglym. Je to fest dziwoki, bo jako piyrsze słowo stoji tam za szybóm ahoj. Każdy tustelok przeca wiy, że je to po czesku, a łóni do dzisia ni majóm żodnego morza na kierym pływajóm taki szyfy. Dalij uż do skryntu s ulicóm Szyrokóm je wszecko po starymu i nima ło czym pisać. Ale zaroz jak przelezymy przez ceste downo gospoda Żak zwekslowała sie na restauracyje "Kamienica Konczakowskich". Co sie tam pomiyniało na lepsze napiszym na prziszły tygodziyń. Mini słownik: poradziłech-potrafiłem, Tóż miyjcie sie wszedcy dobrze i wiesiołego popióntku! Dzisiejszy tekst ma tytuł "Wypłowiały papyndekiel":
|
reklama
|
Dodaj komentarz