CO TYDZIYŃ PO NASZYMU: U nas też kiejsi w każdej dziedzinie piykli inkszy chlyb

na tym szyldzie napisoł po angielsku... fot. FJD

zaroz na winklu je butik... fot. FJD

trefi na bistro, kiere tyn chlyb przeduje... fot. FJD

SZPACYRKYM PO CIESZYNIE

"Moja ty słodko cieszyńsko mowo

być zawsze do prawjynio gotowo

a jak cie uż żodyn nie bydzie rozumioł

to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Lawasze sie mianuje

Obiecane było drepsić dzisio po Głymboki tóż też tak zrobiymy. Ale eszcze przed tym trzeja wszeckim rzeknóć ło tym, że jak kierymu dóma chybi polskigo chleba, to łod dzisia może se aji pod laubami kupić ormiańskigo. Kiery nie wiy kaj to je to niech sie przeszacyruje pod laubami i kole aptyki trefi na to bistro, kiere tyn chlyb przeduje. Coby jednakowóż nie wylazly kómusi łoczy na wyrch jak uwidzi tyn chlyb, co lawasz sie mianuje to za wczasu lepszyj niech cosi ło nim poczyto w jakisi encyklopedyji. Jo go widzioł i nie prziszełbych na to, że taki wykulane ciasto jako kiejsi moja starka rychtowała na nudle to bydzie tyn chlyb. Nie idzie też łod dzisia powiedzieć, że chlyb je zawsze ło dwóch skórkach,bo tyn jejich chlyb ich wubec ni mo. Tyn chlyb bydzie też przidajny dlo tych ludzi co uż majóm fest zedrzite zymby, abo aji dlo tych co ich iż ni majóm wubec. Jak uż bydymy mieć w taszce tyn kupióny chlyb to mogymy sie spadki rozegnać ku Głymboki. Zaroz na winklu przi tym placu kole kościoła, o kierym była łostatnio rzecz je butik, ale uż kierysi nie wydzerżoł i musioł na szyldzie cosi dopisać angielszczynóm. Tak jak by to nie szło ganc zwyczajnie napisać ”twój nowy styl” i każdo aji posuniynto w rokach paniczka wiedziała by zaroz ło co sie rozchodzi. Bo przeca nie każdo baba potrzebuje co chwila nowego stylu jak dejmy na to łóńskigo roku kupiła se drogi szaty, abo modny spodek. Ale isto to naswol kierysi na tym szyldzie napisoł po angielsku, coby żodno paniczka nie zachyciła ło co rzecz sie toczy i wlazła do postrzodka udać u nich naszporowany swój łostatni grosz.

Mini słownik:
drepsić - deptać
lauby - podcienie
przyszełbych na to - wpadłbym na to
wykulane - rozwałkowane
starka - babcia
nudle - makaron
wubec - w ogóle
przydajny - przydatny
zedrzite - zdarte
spadki - z powrotem
szaty - ubranie
spodek - spódnica
naswol - na umyślnie
naszporowany - zaoszczędzony
zachyciła - załapała

Tóż miyjcie sie wszedcy dobrze i wiesiołego popióntku

Dzisiejszy tekst ma tytuł "Lawasze sie mianuje":