CO TYDZIYN PO NASZYMU: Kiejsi każdy chlyb był dobry a dzisio trzeja ło tym prawić coby tustelocy go kupowali

Zdjęcia F.J.Dral

SZPACYRKYM PO CIESZYNIE

"Moja ty słodko cieszyńsko mowo

być zawsze do prawjynio gotowo

a jak cie uż żodyn nie bydzie rozumioł

to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Zustoł przechrzczóny

Dzisio to uż isto możne je łostatni szpacyrek po naszym mieście i trzeja bydzie poprógować eszcze roz go obynś. Na iste przez tych prawie piyńć roków doś moc wiecy w Cieszynie sie pomiyniało i wszymóm se, że bydzie zaś ło czym pisać. Je też to możne, żech kierómsi ulicem minył i bydóm mi to mieli nikierzi za złe, ale nic ni ma przepadnióne,bo mogóm mi to przeca napisać. Ale eszcze zustało kapke tej ulice po kierej drepszymy uż pore tydni i ło ni bydzie dzisio. Po prawo obstoł sie eszcze s downych czasów kszeft, kiery zustoł przechrzczóny na "Lewiatan". Wedla niego, kogosi porwało na nowoczesność i ekologije, bo postawił latarnie ze solarym. Isto mało gdo ło tym wiy, bo nima u ludzi takigo zwyku, coby szpacyrować po chodniku s łoczami dźwigniónymi do wyrchu. Mie sie to podarziło uwidzieć i dlo tych co to do dzisia tego solaru nie spozdrzili zrobiłech zdjyńci. Dalij za tym "Lewiatanym" sóm uż yno same chrosty i stary chasiok, a za nim skrynt w ulice Morcinka. Po lewo za skryntym na piyrszej s kraja pieknie opucowanej chałupie jakisi ATLAS chwoli sie swojimi wiecami. Zaś po prawo stoji mało budka na kierej powieszóne chwolidło prawi nóm ło tym, że uż u nas nie egzystuje żodno piekarnia yno teraz sie to mianuje "Strefa dobrego pieczywa". Co ludzióm poradzi sie wykluć w tych czepaniach, coby yno nagnać tusteloków do swojigo kszeftu i wynś na swoji to ni ma możne. Starzi ludzie do dzisia prawióm na to: "to ni ma możne panoczku", coby to była prowda, ale jak widać wszecko je u nas możne. Dalij idzie uwidzieć raje garaży, a po łobu strónach cesty przistanki autobusowe.

Mini słownik:

na iste-na pewno,
wiec-rzecz,
wszymać –rozumieć,
przeca-przecież,
kapke-trochę,
drepsić-chodzić,
obstoł sie-uchował się,
wedle-obok,
zwyk-zwyczaj,
podarziło-udało się,
chrosty-krzaki,
chasiok-śmietnik,
opucowana-otynkowana,
czepań-głowa,
raja-rząd,
cesta-droga

Tóż miyjcie sie wszedcy dobrze i wiesiolego popióntku.