CO TYDZIYN PO NASZYMU: Dzisio hajcować gazym każdy poradzi

Zdjęcia F.J. Dral

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Tyn tydziyń znaszli sie jednakowóż tacy co sie im zrobiło luto,że nie dóndym do kóńca tej ulicy Morcinka i mie obereszyli.Tóż na tym łostatnim przistanku przi tej raji garaży zacznym dzisio eszcze roz od nowa szpacyrować po ulicy Morcinka.Po lewo stoji bioło-czyrwióno kostkato chałupa s wielkimi łoknami na kierej pisze,że w ni je dystrybicyja gazu.Jako łóni to robióm tego nie wiym,bo naobkoło nie widać żodnych ruł.Możne,że tym gazym rozporzóndzajóm yno na papiórze i skyrs tego podarziło sie im to upuczyć wszecko w jednej chałupie.Gdo jednakowóż nie wiy kaj w Cieszynie idzie sie wystarać ło gaz,a nieskorzij prziś na to jako załatwić wszecki gazowe korowody ,to tyn szyld na tej chałupie mu w tym na iste nie pumoże.Wisi łón ganc wysoko na ścianie za winklym i mo taki małe litery,że posuniyńci w rokach tustelocy na zicher go nie zozdrzóm.Coby eszcze ludzióm ganc zamiyszać w czepaniach to wedla niego na tej plechowej ścianie idzie uwidzieć rozchlaśniónych dziesiyńć wielkich liter i to aże w trzóch rzóndkach.Jesi gdo wiy ku czymu łóne patrzóm to niech mi napisze. Dobrze by było,coby ci co tam robióm w tej chałupie czasym wylyźli na pole i dzwigli łoczy do wyrchu,coby roz za kiedy poczytać w jaki firmie robióm i połómać se jynzyki na mianie " SZ W WNIC O-BI".Za winklym na szurej zieleźnej rułce je tabulka s mianym ulicy Wiktora Kargera przedwojynnego dyrektora muzeum w Cieszynie.Mało gdo isto wiy ,że tyn dyrektor tak chrónił nasze cieszyński skarby muzealne w czasie wojny,że moc ś nich udało mu sie schrónić w kościele św.Trójcy i tymu obstoły sie aże do wyzwolynio.

Mini słownik:

znaszli-znaleźli,
luto-przykro,
dóndym-dojdę,
obereszyć-oprzezywać,
raja-rząd,
skyrs-z powodu,
podarziło sie-powiodło się,
kaj-gdzie,
upuczyć-upchać,
na iste-na pewno,
winkiel-narożnik,
na zicher-na pewno,
plech-blacha,
rozchlaśnióne-rozrzucone,
miano-nazwa

Tóż miyjcie sie wszedcy dobrze i wiesiołego popióntku.

Dzisiejszy tekst ma tytuł "W trzóch rzóndkach":