Szpacyrkym po Cieszynie
“Gdo sie za swój jynzyk wstydzi
takim niech sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.
Wielko szudera
Przestało uż mar-znóć i idzie przeca ku lepszymu, a mantle, kiere grzoły nóm krziża bydymy mógli wrazić do odmaryje. Latoś tej zimy śniega w Cieszynie nie było wiela i możne skyrs tego ty dwa szure stromy, kierech spozdrził, sie eszcze na tustelokow nie obaliły. Kiery chodzi piechty do miasta s Osiedla Liburni ulicóm Moniuszki, to isto nad tym rozmyślo, kiedy i na kogo obali sie ta ogiynto nad tretuarym brzoza. Tak rosmyślóm, że jakby sie ji to podarziło to na zicher s pół tej tej szkarpy na kierej łóna rośnie zustało by wytargane i zasuło by całóm cestem. Co by sie nieskorzij robiło to uż nima ani co rozmyślać, bo dzisio każdy mo auto i musiołby cosi wyszpekulyrować, kierom cestóm jechać do roboty. Nejgorzij by na tym wyszły ty nasze żółte autobusy, kiere dycki dziynne pełne sóm starek i starzików. Nikierzi co uż doszli do siedymdziesiyńciu roków to jeżdżyni tymi żółtkami majóm s darma i uż downo łodwykli łod chodzynio pieszki. Isto s pół dnia, by potrwało to skludzani tej brzozy, kiero i tak na zicher kiejsi sie obali, łod ciynżkigo mokrego śniega, kiery na nióm nasuje, ale isto rychlij jak przidzie jakosi wielko szudera. Moło isto dzisio gdo wiy co to je szudera, ale posunióni w rokach tustelocy dobrze wiedzóm, że je to moc wody kiero naroz gichnie na nas s nieba. Kiejsi jak nie było moc asfaltowych cestów, betónwych tretuarów i inkszych wyłożónych kostkami parkingów, to wode kiero gichała s nieba roz dwa ziym do sie szluchła. A dzisio jak ta woda gichnie s nieba to ni mo sie kaj pomieścić i rzynie wartko po tych spadzistych cieszyńskich cestach do naszej Bobrowki i Olzy.
Mini slownik:
mantel- płaszcz,
wrazić-włożyć,
odmaryja-szafa,
latosi-tegoroczna,
szure-ukośne,
strom- drzewo,
podarziło-udało się,
zicher-na pewno,
cesta-droga,
nieskorzij-później,
dycki-ciągle,
skludzić-posprzątać,
rychlij-szybciej,
szudera-ulewa,
gichnie-chluśnie,
szluchła-połknęła,
rzynie-gna,
Tóż miyjcie sie wszedcy dobrze i wiesiołego popióntku
Nie pisze się czasem "żynie" zamiast "rzynie" ?
Dodaj komentarz