Szpacyrkym po Cieszynie przi tej pieknej pogodzie

F.J.Dral, współpracownik portalu gazetacodzienna.pl, prowadzi kącik gwarowy "Co tydziyń po naszymu", fot. ARC

Tyn tydziyń nie bardzo nóm sie udoł w pisaniu. Isto żeście mieli moc roboty przi kopaniu zimioków łobjyraniu kwaków z naci i eszcze inszej robocie w polu. A ci miastowi eszcze w tóm pieknóm pogode smykali sie po gorach abo jeździli na kole. Ale zaś je cały tydziyń przed nami i tóż sie jakosi pozbjyrejcie i napiszcie cosi o swojich dziedzinach.

Szpacyrkym po Cieszynie

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydze rozumioł
to jyny wiater bydzie po naszymu szumioł"

Forszus dajóm

Bydymy dzisio dalij dżić zole po krziwym tretuarze na Głymboki. Stanyli my przi kiosku z wszelijakimi gazetami i ździorbami do dziecek. Chałupa je doś piekno, mo też kwiotki w łoknach bo isto tam mjyszkajóm szykowni ludzie. Na ścianie je tabulka z kierej sie mogymy dowiedzieć, że je to zabytek architektury polskiej. Nie każdo gazeta w Polsce mo taki szczynści, że przedujóm jóm w takim zabytku. Nie wjym czy skuli tego ty gazety tam sóm droksze boch tam nie wloz. Ale teraz mómy taki czasy, że trzeja wszyndzi za każdóm gupote płacić i nie dołbych moc za to czy łóni uż na to nie prziszli. Taki samo szczynści mo tyn mały kszeft z jedzynim, kiery też je w tym zabytku. Łóni by se mógli w tym kszefcie dorachować zamias opłaty klimatycznej taki dejmy na to dodatek staroświecki. Może jak to poczytajóm to sprubujóm se cosi dorobić. Ciekawe jyno czy mi za tyn napad jaki forszus dajóm. Kónsek dalij je ksiyngarnia ale to uż se niechóm na prziszły tydzyń.

A teraz zać fajny wic:

Farosz prawi przi ołtorzu do młoduchy: - Ślubu wóm nie dóm bo Francek je naprany jak nieboski stworzyni! - A to se myślicie farorzyczku, że jak łón bydzie krzyźby to jo go tu przed ołtorz dostanym?

Mjyjcie sie wszedcy dobrze i życzym Wóm wiesiołego popiątku.

F.J. Dral czyta opowiadanie "O Karliku", Józefa Ondrusza z książki "Proza ludowa górników karwińskich".