CO TYDZYŃ PO NASZYMU: S mianami na kszeftach mómy dzisio tak jak kiejsi hańdownij było za Austryje

...kszefcóm tam rozmajtymi taszkami...

...nad tóm poróm dziecek...

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

Jak za Franca Jozefa
Jak uż tak przi tym szpacyrowaniu po Głymboki wszeckigo nakupiymy, to przeca trzeja tyn towor do jakisikej taszki wrazić. Isto skyrs tego, kierysi prziszeł na to coby pod nomerym sztyry a trzicet/ 34/ taki kszeft odewrzić. Mianuje sie łón “Lokiss” i też to je isto po zagramanicznymu jako wszecki inksze kszefty wedla niego.Przeca isto by musiół sztraf zapłacić, coby go zmianować po naszymu. Przez auslage jadnakowóż widać, że kszefcóm tam rozmajtymi taszkami, ruksakami, kuframi i aji szrajtoflami i nie trzeja ani bryli s kapsy wycióngać, coby prziś s tym do porzóndku, na co utracymy u nich pnióndze. Zaś na ścianie wedla jejich auzlagi idzie uwidzieć modróm tabulke s biołymi literami, łod jakigosi dochtora, kiery badze szoferów. Musi to być eszcze jakisi młodziok, bo tam na tej tabulce pisze, że styknie mu yno trzi godziny do tydnia, coby wszeckich chyntnych do zawodu szofera pooglóndać. Kónsek dalij pod nomerym dwija trzicet/32/ , kierysi isto s Italije przijechoł, bo zamias ganc po ludzku zmianować swoj kszeft “krokodyl” to napisoł “COCCODRILLO”. Prziś na to czym łóni tam kszefcóm miołech moc starości, bo za jejich auslagóm stoji kluk z dziywczyńciym, kiero dzierży porwózek lod furkajóncego w lufcie czyrwiónego draka. I tak naprowde nie wiym na co idzie u nich udać pinióndze, bo eszcze nad tóm poróm dziecek wisi kartka, kiero namowio nas, coby se kupić jakómsi sale i to łacnij aże ło sztyrycet procynt. Tak rozmyślóm, że w Cieszynie mómy zaś tak samo jak kiejsi za Fraca Jozefa, kiedy kszefty mieli tu Polocy, Austryjocy, Czesi i aji Żydzi i skyrs tego każdy swój kszeft mianowoł po swojimu.

Mini slownik:
taszka-torba,
prziszeł na to-na pomysł,
odewrzić-otworzyć,
wedla-obok,
zdzierżeć-wytrzymać,
zmianować-nazwać,
auslaga-wystawa,
ruksak-plecak,
szrajtofla-portmonetka,
bryle-okulary,
kónsek-kawalek,
ganc-całkiem,
moc starości-dużo problemów,
kluk-chłopiec,
luft-powietrze,
drak-latawiec,
łacnij- taniej,
skyrs-z powodu.

Tóż miyjcie sie wszedcy dobrze i wiesiołego popióntku