CO TYDZIYŃ PO NASZYMU: Zmianować ulice ptoszkami to je fajny napad

”...postawióny w 1939 roku”Dom Macierzy Szkolnej”...”

”zar-zowiało tabula ku pamiynci Teofila Tomiczka...”

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie ”kursywom” na tóm czornóm szczałke w tej szarej kostce, kierom nóndzie zaroz pod spodkym.

POJCZOWAŁY GAZDÓM

Dzisio uż nie pujdymy dalij tóm ulicóm Hallera, bo hnet bymy sie naszli w Dzingielowie. Skyrs tego trzeja sie bydzie kapke curyknóć i na krziżowatce wlyś w ulicem Słowiczóm. Wszecki odboczynia łod ni, to je cały świat ornitologiczny, bo isto gdo ty miana wyszpekulyrowoł mioł dóma klotki s ptokami. Narachowołech tych ulic trzinos, a wszecki majóm miana łod ptoków, kiere furgajóm w lufcie. Je tam eszcze kapke wolnego pola i możne, że kierysi nieskorzij zmianuje ty ulice kierych eszcze nima, ptokami co drepszóm po no nogach i bydóm to isto ulice łod strusia pingwina, kiwi i emu. Coby jednakowóż tuplowanie to było po naszymu to piekniejsze sóm miana łod ptoków co nie furgajóm, a sóm u nas chowane i mianujóm sie trusiokami,gynsiami, kaczkami,perliczkami i kohótami s kurami. Zaros s kraja za tóm krziowatkóm stoji postawióny w 1939 roku “Dom Macierzy Szkolnej, kiery dzisio ze szkołóm nimo uż nic społecznego. Słyszołech, że najyły go Mnisztwianki i udowajóm, że fórt sóm na dziedzinie, bo Koło Gospodyń Wiejskich, kiere tam egzystuje do wielkigo miasta Cieszyna nie pasuje. Nie wiym czy to je ganc prowda s tymi”gospodyniami", bo pudliczko na listy, kiere wisi tam na dwiyrzach je łod “Kółka Rolniczgo”. Kiejsi za socjalizmu taki kółka rolnicze pojczowaly gazdóm rozmajte maszyny do uprawy pola i miały na nich plac czego kole tej chałupy wubec nie widać. Zaś na ścianie po prawej strónie dwiyrzi wisi zar-zowiało tabula ku pamiyńci Teofila Tomiczka zamordowanego przez hitlerowców w 1942 rokui i ja mi luto, bo nie widać coby kierysi jóm opatrowoł.

Mini słownik:

hnet - zaraz,

kapke - trochę,

curyknóć - cofnąć,

luft - powietrze,

nieskorzij - później,

drepszóm - chodzą,

trusiok - indyk,

krziżowatka - skrzyżowanie,

fórt - ciągle,

dziedzina - wieś,

dwiyrze - drzwi,

opatrowoł - opiekował,

luto - przykro

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Pojczowały gazdóm".