CO TYDZIYŃ PO NASZYMU: Zeprzić zadek na twardym, to na krziża ni ma dobre “...Ty kolca sóm tak wielki, że...”. fot. FJD być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Dzisio sie chycymy za ty kolca kiere kierysi postawił wedla Olzy, bo jakosi nie idzie potkać takich, co by s tego byli radzi. Na tych co prziszli na to, coby to tam postawić, bydzie ciynżko trefić, bo dycki to je tak, że jak sie cosi nie podarzi, to winnych chybio. W jednym kolcu sóm sztyry siedziska, ale trzeja tam se siednóć ze znómymi, bo łóne sóm tak postawóne jak w kolasie, abo ze zadku w autobusie. Kiery by to wydzierżoł, siedzieć na prociw jakigosi cudzego chłopa, abo baby i eszcze ś nimi rzóndzić nie wiadómo ło czym. Zaś w inszym kolcu s połukłodanych wedla siebie laśniczek, sóm sztyry legiery, na kierych poradzóm sie yny wyprościć tustelocy, kierzi majóm eszcze zdrowe krziża. Ty kolca sóm tak wielki, że jak nie przidzie jakosi wiynkszo szudera, to pudzie tam po suchu jakisi czas wydzierżeć. Zaś wedla tych kolców zbitych z drzewianych desek, sóm taki szyrsze legiery, na kiere wlezie tata s mamóm i eszcze ku tymu ze dwa dziecka. Co to kómu do taki leżyni, tego nie wiym, bo jak łoczy dźwignie do wyrchu to bydzie widzioł kónory drzew i yno kónsek nieba. Dłógo to isto ci ludzie na tym twardym nie wydierżóm, bo przeca każdy woloł by se legnóć na strużoku, abo na jakimsi madracu. Siednóć sie na tym też bardzo nie do, bo to ni mo ze zadku żodnego oprziska i skyrs tego nie idzie na tym dłógo usiedzieć. I możne, że je to tymu tak zrobióne, coby jedyn drugigo s tego nie zganioł, bo sóm wartko roz dwa slezie, jak go rzić zaboli. Dziynka tymu za niedłógi czas, wszedcy w Cieszynie bydóm mógli rzeknóć, że zeprzili swojóm rzić na czymsi, czego dóma ni majóm. Mini słownik: wedla - obok, dycki - zawsze, podarzi - uda się, chybio - brakuje, wydzierżoł - wytrzymał, rzóndzić - rozmawiać, lajśniczka - listwa, legier - miejsce do leżenia, szudera - ulewa, isto - pewnie, legnóć - położyć, oprzisko - oparcie, skyrs - z powodu, rzić - tyłek, zeprzili - posadzili. Mjyjcie sie wszedcy dobrze i wiesiołego popióntku.
|
reklama
|
|||||||||||||||
|
Dodaj komentarz