“Gdo sie za swój jynzyk wstydzi takim nich sie każdy brzidzi”
"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"
POZÓR! Kiery nimo chynci tego czytać, abo kansi wraził łokulory, abo mo moc roboty i łoczy go bolóm to se może tego posłóchać jak prziciśnie tóm biołóm szczałke w tej czyrwiónej kostce, kieróm nóńdziecie pod spodkym”.
Na ceście “zebra”
Dzisio zaś bydzie wszeckigo po kapce, bo cały tydziyń nic takigo zaimawego w Cieszynie sie nie przitrefiło, coby szło ło tym cosi rzeknóć. Łod poru tydni wszedcy szoferzi majóm przikozane, coby dować pozór na tych, co majóm chyńć przelazować na drugóm strónem cesty. Pół biydy, jak robiymy to na krziżowatce na kierej mrógajóm światła, ale gorzij mómy s tym, jak trefi sie nóm na ceście “zebra”. Przed nióm dycki zaczyno sie na ceście gónitwa, gdo kogo przedbiygnie. Takich “zebrów” w mieście mómy doś moc i byłby uż czas, coby biołóm farbóm taki sztrajfki na cestach przed tymi “zebrami” wysztrajchować. Ubyło by to moc nerwów wszeckim do kupy, bo tyn co przelazuje przez ceste widzioł by s daleka, że auto uż naprowde sie zastawiło. Zaś każdy szofer, też uż by przestoł szpekulyrować kaj mo przed tóm zebrom stanóć, coby żodnymu nie zawadzać. Inszo wiec, to sieczyni trowy na wszeckich miastowych trownikach, bo s tym je wiecznie jakosi ostuda. Przi cestach po kierych gzujóm auta, rotuzowi majóm przikozane siyc trowem na meter od krawynżnika, a tam dalij mo to sieczyni skóńczyć tyn, łod kogo je tyn grónd. Wszecko by było dobre jakby to zustało wycieczóne chocioż w tym samym tydniu, ale dycki to je tak, że mało kiedy idzie widzieć, że łóni sie ze sebóm dorzóndzili. Poznać to idzie po tym, że ty trowniki wyglóndajóm jak modnie wystrzigane chłopski głowy. Nad uszami prawie glaca, a na wyrszczku głowy czuba włosów, kieróm udowo ta trowa, o kierej je dzisio rzecz.
Redakcja nie ponosi odpowiedzialności za treść komentarzy pozostawionych przez internautów. Komentarz dodany przez zarejestrowanego użytkownika pojawi się na stronie natychmiast po dodaniu. Anonimowy komentarz zostanie opublikowany z opóźnieniem, po jego akceptacji przez redakcję. Komentarze niezgodne z regulaminem będą usuwane.
Dodaj komentarz