CO TYDZIYŃ PO NASZYMU: W tej pandemiji mómy wszecko inaksze
być zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Niezdrowym luftymJakosi wartko latoś migły nóm ty świynta, bo prawie wszedcy byli dóma i se spóminali, jako to eszcze porem roków tymu siedzieli całymi familijami przi stole. Wszeckimu je ta pandemija winno i na co by yno człowiek dzisio zozdrził, to je to jakisi inaksze. Aji tyn szpatny czas, kiery fórt nóm dokuczo, też mómy isto skyrs tego, że ludzie przestali sie plyntać po cestach i zoroz wszyndzi sie wychłódziło. Kierysi mi to dzisio tak wyłoślił, że ludzie wedla siebie sami sebóm grzejóm luft, a jak siedzóm dóma to grzejóm yno swój kwartyr i tymu na polu je tej wiosny tak fest zima. Dzisio jak wszedcy siedzóm dóma, to uż tak pod blachóm fest jak kiejsi nie hajcujóm i na zicher podarziło sie im zaszporować cosi kapke wiyncyj na wónglu. Kaj by człowiek nie zozdrził i kaj by do czego nie żgnył, to wszecko je jakisi inaksze i nie pasuje do tego, co było przed pandemijóm. Nejgorzij majóm ludzie, kierzi ni mogóm do tego prziwyknóć, bo fórt sie im zdo, że sóm to jakisi błózna i tego wirusa bydóm poradzili obynś. Przedstowcie se, że eszcze łóńskigo roku jak żech zakludził swoji auto do przegłóndu, to siedziołech w nim cały wylynkany i musiołech robić wszecko to, co mi kozoł mechaniker. Cały czas mie wahowoł co bych nie wydychnył przipadkym kansi na boku niezdrowym luftym i nie narobił jakigosi nieszczynścio. Latoś uż żodyn nie kozoł mi w tym aucie siedzieć, chocioż je dziesiyń razy wiyncyj chorych na tego wirusa i nie wiym skyrs czymu sie to tak wszecko zwyrtło i tyn przeglónd zaczli robić tak samo jak kiejsi. Mini słownik gwary cieszyńskiej:wartko - szybko, dóma - w domu, zozdrził - popatrzył, inaksze - inne, szpatny czas - brzydka pogoda, fórt - ciągle, skyrs - z powodu, plyntać po cestach - plątać po drogach, wyoślił - wytłumaczył, luft - powietrze, kwartyr - mieszkanie, fest - mocno, pod blachóm - po piecem, hajcujóm - palą, na zicher - na pewno, zaszporować - zaoszczędzić, kaj - gdzie, żgnył - pchnoł, jakisi błozna - jakieś żarty, obynś - obejść, zakludził - zaprowadził, wylynkany - wystraszony, wahowoł - pilnował, kansi - gdzieś, latoś - w tym roku, zwyrtło - przekręciło. Tóż miyjcie sie wszedcy dobrze i wiesiołego popióntku.
|
reklama
|
Dodaj komentarz