CO TYDZIYŃ PO NASZYMU: Ustrojić wszecko idzie, yno trzeja wiedzieć jakobyć zawsze do prawjynio gotowo a jak cie uż żodyn nie bydzie rozumioł to jyny wiater bydzie po naszymu szumioł" Zahoczymy dzisio kapke ło Czechy, bo po drugi strónie Olzy też je przeca Cieszyn i cosi tam je do obezdrzynio. Jak stanymy na moście to ciepnie sie nóm na łoczy tako kulato chałupa, kiero “AVION” sie mianuje. W ni idzie dostać kawe i jakómsi dorte, abo ciacho, a kutymu mogymy se eszcze poczytać rozmjte gazety. Wszecko by było piekne, jakby łóna była odewrzito tak jako majóm to we zwyku insze kawiarnie, ale skyrs czymu zawiyrajóm jóm dziynnie tak wczas tego wubec nie wiym. Przedstowcie se, że uż o szóstej ku wieczoru łóna je zawrzito, a w niedziele ji wubec nie otwiyrajóm. Tak se myślym, że bratatrzi Czesi tak to szpekulyrujóm, że niech Polocy u siebie robióm rozmajte hałdamasze, a my chcymy w niedzieliczce mieć “klid”. Jak to robióm, że sie im to ryntuje, tego nie wiym, ale na zicher kierysi musi do tego dopłocać. U nas jak by to było czyjisi, to dwiyrze odewrzite by tam mieli na zicher dziynnie aże do północy. S tego mostu Przyjażni eszcze idzie eszcze zoczyć te wieże od PLEYA, kiero kapke wyzyzuje s poza drzew. Tela było skyrs tego krawalu, że bydzie zawadzać tej starej wieży, a nikerzi aji prawili, że aji tej rotundzie s dwacadki, a dzisio ledwie jóm widać. A tak naprowde ganc by ji nie było widać jakby jóm tak ustrojić zielónymi gałynziami s plastiku, kiere by aji w zimie były zielóne. Jeszcze lepszyj by było, coby jóm ustroić na Gody i powieszać na ni rozmajte świycónce kety i bańki. I eszcze mielibymy jednóm atrakcyje skyrs kierej rozmajci lufciorze i letnikorze walili by do Cieszyna łoknam i dwiyrzami. A może kierysi mo eszcze inszy napad? Mini słownik: kapke - trochę, do obezdrzynio - do zobaczenia, kulato - okrągła, dorta - tort, odewrzito - otwarta, skyrs - z powodu, zawiyrajóm - zamykają, hałdamasz - zabawa, klid - spokój, na zicher - na pewno, dwiyrze - drzwi, zoczyć - zobaczyć, wyzyzuje - wygląda, Gody - święta, kety - łańcuchy, bańki - bombki, lufciorziei letnikorze - turyści i wczasowicze napad - pomysł. Mjyjcie sie wszedcy dobrze i wiesiołego popióntku.
|
reklama
|
Dodaj komentarz