”...dwie gspody w Cieszynie uż zmóndrzały...”. fot. FJD

Do korzónt

Na rozmajte wieca idzie trefić przi tej pandemiji, ale łone też sie kiejsi przeca skóńczóm i “Szpacyrek po Cieszynie” trzeja bydzie możne aji poniechać. Dzisio prziszło mi do czepani taki rozmyślani nad tym, jako to trzeja dzisio nad sebóm i swojim kszeftym szpekulyrować, coby zacznóć robić. Kiejsi moc było takich co rozmyślali dziynnie nad tym, jako to robić, coby nic nie robić, a zarobić. Dzisio wszecko sie poprzekopyrtło i zaczyno być zaś dziynka bogu wiyncyj takich, co szpekulyrujóm jako to zrobić, coby zaś robić i cosi zarobić. Eszcze trzicet roków tymu prawiło sie ludzióm, coby zaczli sami rozmyślać jako to robić coby zarobić, bo socyjalizm sie kóńczył i każdy musi zacznóć sóm porozmyślać jaki interes odewrzić. Nejlekciyj i nejpryndzyj dali sie ludzie do łotwiyranio rozmajtych gospód, bo do tego nie trzeja było moc rozmajtych geszteli , yno trzeja było umieć dobrze warzić. Hańdwnij wszedcy wszecko warzili i piykli dóma, to stykło yno tego samego nawarzić we wiynkszym garcu i nahósować tych ludzi co zarobiajóm prowdziwne pinióndze, coby prziszli do nich se pojeś. Ale jak uż to zustało jako tako rozegnane, to prziszła ta nieszczynsno pandemija i tustelokóm kozali ty gospody pozawiyrać. Kiejsi ludzie mało zarobiali i żodyn na łobiod do gospody nie szeł, bo każdo paniczka swojimu chłopu i dzieckóm nawarziła jedzynio dóma. Dzisio uż ludzie sfajnieli i zaczli sie kustować po gospodach, bo to dycki jak sie mo kapke wiyncyj grosza w kapsie, je praktyczniejsze. Skyrs tego tyn tydziyń uż dwie gospody w Cieszynie zmóndrzały i odewrziły dlo tusteloków swoji dwiyrze do korzont.

Mini słownik gwary cieszyńskiej:

wieca - rzeczy, kiejsi - kiedyś, poniechać - zostawić, czepań - głowa, kszeft - interes, szpekulyrować - kombinować, przekopyrtło - przewróciło, trzicet - trzydzieści, prawilo sie - mówiło się, odewrzić - otworzyć, nejlekciyj - najłatwiej, gesztel - urządzenia, hańdownij - dawniej, nahósować - namówić, żodyn - nikt, sfajnieli - wydelikatnieli, kustować - odżywiać, dycki - zawsze, kapke - trochę, kapsa - kieszeń, skyrs - z powodu, do korzónt - na ościerz.

Tóż miyjcie sie wszedcy dobrze i wiesiołego popióntku.