CO TYDZIYŃ PO NASZYMU: Tuplowanie jedyn potók, abo możne dwa?

”...kiery też sie nazywo Sarkander...”. fot. FJD

”...kierysi kszefci komputrami...". fot. FJD

SZPACYRKYM PO CIESZYNIE

"Moja ty słodko cieszyńsko mowo
być zawsze do prawjynio gotowo
a jak cie uż żodyn nie bydzie rozumioł
to jyny wiater bydzie po naszymu szumioł"

Drugi potók

Kapkem żech za wartko przeloz na tóm drugóm strone cesty na tej Stawowej, a tam dalij je eszcze moc dziwów o kierych dzisio napiszym. Piyrsze to, żech trewił na drugi potók kiery też sie nazywo Sarkander. I teraz nie wiym czy kómusi nadbyło tabliczek i na piyrszej lepszej przikopie na kuliku jóm powiesił, czy możne tyn świynty kogosi na spaniu nawiedził i tak tymi cieszyńskimi potokami rozporzóndził. Wedla cesty też trefiymy na dwie tabulki, kiere wyklarujóm wszeckim, że nasz Cieszyn je tak wielki, bo mo aż dwie dzielnice ło takim samym mianie. Jedna to je Bobrek Zachód a drugo tako samo jyno sie mianuje Wschód. Kiery nima tu stela nie bydzie pradził zachycić o co sie rozchodzi i możne, że przirówno Cieszyn do Warszawy kiero też mo dwie dzielnice ło tym samym mianie. Dalij w taki pieknej chałupce kierysi kszefci komputrami i jakimisi kasami, kiere dzisio potrzebujóm wszedcy kszefciorze. Kapke tyn kszeft mo łod rynki, ale isto rachuje też na tych co przidóm cosi kupić do kszeftów w downym "Elektometalu". Łón sie eszcze łobstoł, ale jyno w tej wielki chałupie, bo reszte najyli kumu sie yno dało. I teraz jak wszyndzi w Cieszynie je tam moc interesów, kiere se fest wożóm bratrzi Czesi, a szpecyjalnie ci kierzi chycili sie jakisikej budowy, bo cymynt, dachówki farby i inksze przidajne wieca majóm u nich lewniejsze. Nie wiym co genał wyrobiajóm dzisio w tym Elektrometalu, bo to coch o nich wyczytoł w internecie to nima może coby sie tam u nich pomieściło. Ale je możne, że piszóm prowde o sobie, bo przi dzisiejszej tecnologiji aji w garażu idzie robić komputry.

Mini słownik:

wartko - szybko,

cesta - droga,

o kierych - o których,

kulik - kołek,

wedla - obok,

miano - imię/nazwa,

tu stela - to stąd,

zachycić - zajarzyć,

kszefci - handluje,

fest - bardzo,

wieca - rzeczy,

genał - dokładnie,

lewniejsze - tańsze,

wożóm - szanują.

Miyjcie sie wszedcy dobrze i wiesiołego popióntku!

Dzisiejszy tekst ma tytuł "Drugi potók".