Pod celtami

Nie wiym czy wszedcy latoś obezdrzili te pradawnóm dziedzine, kiero egzystowała porem dni tym na zómku w Cieszynie, ale jesi sie ni, to możne zaś na rok trefi sie wóm tako przileżytoś. Tak rozmyślóm, że dobrze by było, coby ta dziedzina pod tymi celtami stoła tam caluśki rok. Bo przeca uż chyba wszedcy zachycili, że ta dzisiojszo cywilizacyja mo sie ku kóńcowi i człowiek zaś bydzie musioł iś spadki tam skónd prziszeł. Możne, że eszcze ni na strómy, ani do jaskinie, ale do takich dziedzin jako była ukozano na zómku, to na iste. Bo dzisio tyn wiater, kiery tak fest wszyndzi na świecie ducho, poradzi obulać każdóm chałupe i za chwiliczkem naprowde miyszkać bydymi yno zaś spadki pod celtami ze skóry, abo na kóniec w jaskiniach. Coby jednakowóż jakosi egzystować, to trzeja bydzie zacznóć rozmyślać, jako i czym chocioż roz za kiedy nafilować swój bachórz. Bo przeca wszedcy wiedzóm, że bez jedzynio i picio dłogo człowiek nie poradzi egzystować. Nie wiym skyrs czymu ci młodziocy, kierzi na zómku udowali starodownych ludzi ukazowali yno jako sie rożygo łognisko, a nie prziszli na to, że trzeja też ukozać jako sie chowie rozmajte stworzynia. Trzeja uż dzisio spadki uczyć ludzi, jako sie doji krowem, jako sie zbiyro s mlyka śmietónkem i jako nieskorzij ś ni ubijo sie masło. Dobrze by też było zaś wiedzieć, że barany chowie sie na wełnem s kierej idzie usztrykować rozmajtóm oblyczkem. Dobre by też było ukozać ludziom, jako i czym bydymy każdego roku w tych celtach hajcować, coby przeżyć we zdrowiu do wiosny. Moc uż nóm czasu na te naukem nie zustało, bo jak widać s tego nieszczynścio kierego je pełno na świecie, notura zaczła sie upóminać o swoji prawa.

Mini słownik gwary cieszyńskiej:

latoś - w tym roku, obezdrzili - obejrzeli, dziedzina - wieś, pryleżytoś - okazja, celty - namioty, zachycili - załapali, spdki - z powrotem, to na iste - to na pewno, ducho - wieje, obulać - przewrócić, nafilować - napełnić, bachórz - brzuch, skyrs - z powodu, rożygo - zapala, nieskorzij - później, usztrykować - zrobić na drutach, oblyczka - odzież, hajcować - palić.

Tóż miyjcie sie wszedcy dobrze i wiesiołego popióntku!